पुण्यातील ढोल ताशा पथकांना सर्वोच्च न्यायालयाचा दिलासा, राष्ट्रीय हरित लवादाच्या निर्णयाला स्थगिती

पुण्यातील ढोल ताशा पथकातील सदस्यांच्या संख्येवर राष्ट्रीय हरित लवादाने घातलेल्या बंधनांवर सर्वोच्च न्यायालयाने स्थगिती आणली आहे. देशाचे सरन्यायधीश धनंजय चंद्रचूड यांच्या अध्यक्षतेखालील खंडपीठाने पुण्यातील ढोल ताशा पथकांना मोठा दिलासा दिला आहे. ”ढोल ताशा हे पुण्याच्या हृदयात आहे. करू दे त्यांना काय करायचे ते”, असे सांगत चंद्रचूड यांनी हरित लवादाच्या या निर्णयावर स्थगिती आणली.

पुण्यातील ढोल ताशा पथकात मानाच्या गणपतीची निघणारी मिरवणूक ही जगभरात प्रसिद्ध आहे. या मिरवणूका बघण्यासाठी दूर दूरहून भाविक पुण्यात येत असतात. मात्र या ढोल ताशा पथकांमुळे होणाऱ्या ध्वनी प्रदुषणावर रोख आणण्यासाठी राष्ट्रीय हरित लवादाने पुण्यातील ढोल ताशा पथकांना काही नियम अटी घालून दिल्या होत्या. त्यानुसार ढोल ताशा झांज पथकात 30 पेक्षा जास्त सदस्य असू नयेत तसेच त्यांच्याकडून होणाऱ्या ध्वनी प्रदुषणावर महाराष्ट्र प्रदुषण नियंत्रण मंडळाने लक्ष ठेवण्याचे आदेश दिले होते. तसेच राष्ट्रीय हरित लवादाने दिलेल्या नियमांचे उल्लंघन झाल्यास पथकाचे साहित्यही जप्त करण्याचे आदेश देण्यात आले होते.

 या याचिकेवर सरन्यायाधीश धनंजय चंद्रचूड आणि न्यायाधीश जे. बी. पारदीवाला, मनोज मिश्रा यांच्या खंडपीठासमोर गुरूवारी दुपारी सुनावणी पार पडली.