स्वामी रामगिरी महाराजांचे आक्षेपार्ह व्हिडीओ सोशल मीडियावरून काढून टाका, पोलिसांना दिले आदेश

स्वामी रामगिरी महाराजांचे आक्षेपार्ह व्हिडीओ सोशल मीडियावरून काढून टाका, असे आदेश उच्च न्यायालयाने पोलिसांना दिले. मोहम्मद पैगंबरांबाबत चुकीचे विधान केल्याचा आरोप स्वामी रामगिरी महाराजांवर आहे.

अमीन इद्रिसी यांनी ही याचिका केली आहे. स्वामी रामगिरी महाराज यांचा व्हिडीओ सोशल मीडियावर व्हायरल झाला आहे. याने मोहम्मद पैगंबर व मुस्लिम समाजाची बदनामी होत आहे. मुंबई पोलीस आयुक्त व कांदिवली पोलिसांकडे याची तक्रार करण्यात आली. पोलीस काहीच कारवाई करत नाहीत. न्यायालयानेच या प्रकरणी गुन्हा नोंदवण्याचे व सोशल मीडियावरून हे व्हिडीओ काढून टाकण्याचे आदेश द्यावेत, अशी मागणी याचिकेत करण्यात आली आहे.

न्या. रेवती मोहिते-डेरे व न्या. पृथ्वीराज चव्हाण यांच्या खंडपीठासमोर या याचिकेवर सुनावणी झाली. स्वामी रामगिरी महाराज यांच्या आक्षेपार्ह विधानामुळे दोन समाजांत तेढ निर्माण होत आहे. त्याने गंभीर परिस्थिती निर्माण होण्याची शक्यता आहे, असे याचिकाकर्त्यांचे वकील एजाज नख्वी यांनी खंडपीठाच्या निदर्शनास आणले. त्याची दखल घेत न्यायालयाने वरील आदेश दिले. यावरील पुढील सुनावणी दोन आठवडय़ांनी होणार आहे.

Tags:

About The Author

Manisha Thorat- Pisal

सौ. मनिषा-थोरात-पिसाळ गेल्या १२ वर्षांपासून पत्रकारिता क्षेत्रात कार्यरत आहेत. ‘‘न्यूज एक्सप्रसे मराठी’’ या पुणे जिल्ह्यातील आघाडीच्या न्यूज पोर्टलच्या कार्यकारी संपादक म्हणून जबाबदारी सांभाळत आहेत. सामाजिक, राजकीय, शैक्षणिक आणि औद्योगिक क्षेत्रातील विविध समाजपयोगी उपक्रमांमध्ये त्यांनी योगदान दिले आहे.