Nagar News – घाटात ब्रेक फेल झाला, भरधाव कंटेनरची कामगाराला चिरडत चार वाहनांना धडक

इमामपूर घाटात ब्रेक फेल झाल्याने भरधाव कंटेनरने आधी कामगाराला चिरडले. मग चार वाहनांना धडक दिल्याची घटना घडली. या अपघातात सहा जण जखमी झाले आहेत. शनिवारी दुपारच्या सुमारास ही घटना घडली. रामदास पवार असे मयत कामगाराचे नाव आहे. पवार रस्त्यावरील खड्डे बुजवण्याचे काम करायचा.

छत्रपती संभाजीनगरकडे जाणाऱ्या कंटेनरचे पांढरी पुलाजवळील इमामपूर घाटात ब्रेक फेल झाले. ब्रेक फेल झाल्याने चालकाचे वाहनावरील नियंत्रण सुटले. यानंतर अनियंत्रित कंटेनरने आधी रामदास पवार यांना चिरडले. त्यानंतर दोन दुचाकी, एक टेम्पो आणि एक हार्वेस्टर अशा चार वाहनांना धडक दिली. या धडकेत चार वाहनांतील सहा जण जखमी झाले. जखमींना रुग्णालयात उपचारासाठी नगरला हलवण्यात आले आहे.

वाहनांना धडक दिल्यानंतर कंटेनर पांढरी पुलाजवळ जाऊन थांबला. त्यानंतर कंटेनर चालकाने वाहन तेथेच सोडून धूम ठोकली. या अपघाताची माहिती मिळताच एमआयडीसी पोलीस आणि महामार्ग पोलिसांनी घटनास्थळी धाव घेत अपघातग्रस्त वाहने रस्त्याच्या बाजूला काढत वाहतूक सुरळीत केली.

Tags:

About The Author

Manisha Thorat- Pisal

सौ. मनिषा-थोरात-पिसाळ गेल्या १२ वर्षांपासून पत्रकारिता क्षेत्रात कार्यरत आहेत. ‘‘न्यूज एक्सप्रसे मराठी’’ या पुणे जिल्ह्यातील आघाडीच्या न्यूज पोर्टलच्या कार्यकारी संपादक म्हणून जबाबदारी सांभाळत आहेत. सामाजिक, राजकीय, शैक्षणिक आणि औद्योगिक क्षेत्रातील विविध समाजपयोगी उपक्रमांमध्ये त्यांनी योगदान दिले आहे.