सशस्त्र दलांनी युद्धासाठी तयार राहावे! संरक्षणमंत्री राजनाथ सिंह यांचे मोठे विधान

जगभरात सध्या अनेक उलथापालथी होत आहेत. एकीकडे रशिया-युक्रेन, तर दुसरीकडे इस्रायल आणि हमासमध्ये युद्ध सुरू आहे. हिंदुस्थाचे शेजारील देश बांग्लादेश, पाकिस्तानमधील परिस्थितीही चिंतेची बाब आहे. या सर्व पार्श्वभूमीवर केंद्रीय संरक्षणमंत्री राजनाथ सिंह यांनी मोठे विधान केले असून सशस्त्र दलांनी युद्धासाठी तयार राहण्याची आवश्यकता आहे, असे म्हटले.

हिंदुस्थान हा शांतताप्रिय देश आहे. पण शांतता टिकवून ठेवण्यासाठी सशस्त्र दलांना युद्धासाठी तयार राहण्याची गरज आहे, असे संरक्षणमंत्री राजनाथ सिंह म्हणाले. लखनऊ येथील पहिल्या जॉइंट कमांडर्स कॉन्फरन्समध्ये ते बोलत होते. ‘इंडिया टूडे’ने याबाबत वृत्त दिले आहे.

रशिया-युक्रेन युद्ध, इस्रायल-हमासमधील संघर्ष आणि बांगलादेशीत सद्यस्थितीचा दाखला देत राजनाथ सिंह यांनी भविष्यातील आव्हानांचा अंदाज घेण्याचे आणि अनपेक्षित परिस्थितीसाठी तयार राहण्याचे आवाहन सशस्त्र दलांना केले. यासह उत्तरकडील राज्यांमध्ये शांतता आणि स्थिरता टिकवून ठेवण्यासाठी सीमेवरील आणि शेजारील देशांचे विश्लेषण करण्याची गरजही राजनाथ सिंह यांनी अधोरिखित केली.

राजनाथ सिंह म्हणाले की, जगभरात अस्थिरता असताना हिंदुस्थानमध्ये शांतता नांदत असून विकसित राष्ट्राकडे वाटचाल करत आहे. मात्र वाढत्या आव्हानांमुळे आपण सावध राहण्याची गरज आहे. वर्तमानावर लक्ष केंद्रीत करण्यासाठी आजूबाजूला घडणाऱ्या घटनांवर लक्ष देणे आणि त्यासाठी मजबूत राष्ट्रीय सुरक्षा असणे आवश्यक आहे.

आपल्याकडे पारंपरिक आणि अत्याधुनिक अशी मिश्र युद्धजन्य उपकरणे असणे आवश्यक आहेत, असे म्हणत सिंह यांनी लष्करी नेतृत्वाला डेटा आणि आर्टिफिशियल इंटेलिजन्सच्या क्षेत्रामध्ये अधिक चांगल्या तंत्रज्ञानाचा वापर वाढवण्यावर, तसेच आधुनिक काळातील आव्हानांचा सामना करण्यासाठी अंतराळ व इलेक्ट्रॉनिक युद्धातील क्षमता वाढवण्यावर भर देण्याचे आवाहनही केले. अर्थात हे घटक कोणत्याही संघर्षात किंवा युद्धामध्ये प्रत्यक्ष सहभाग घेत नाही. मात्र ते अप्रत्यक्षपणे युद्धाचा मार्ग आणि परिणाम ठरवत असतात, असेही सिंह यांनी अधोरेखित केले.