टेक्सासमध्ये अपघातानंतर SUV ला भीषण आग, 4 हिंदुस्थानींचा होरपळून मृत्यू

अनेक वाहने एकमेकांवर आदळल्यानंतर SUV ला भीषण आग लागून कारमधील 4 हिंदुस्थानींचा होरपळून मृत्यू झाला. मृतांमध्ये एका तरुणीचा समावेश आहे. चार हिंदुस्थानींपैकी तिघे तरुण तेलंगणातील तर तरूणी तामिळनाडूतील रहिवासी आहे. आर्यन रघुनाथ ओरमपती, फारुख शेख, लोकेश पालाचारला आणि दर्शिनी वासुदेवन अशी अपघातात मृत्यू झालेल्या चौघा हिंदुस्थानींची नावे आहेत. चौघेही यूएसमधील बेंटोनविले प्रवासासाठी कारपूलिंग अ‍ॅपद्वारे कनेक्ट झाले होते.

भरधाव ट्रक अनियंत्रित झाल्याने हा अपघात घडला. अनियंत्रित ट्रकने एसयूव्हीसह पाच वाहनांना जोरदार धडक दिली. या धडकेनंतर एसयूव्हीने पेट घेतला. यावेळी कारमधील चौघेही गाडीत अडकल्याने आगीत होरपळून त्यांचा मृत्यू झाला. आगीत होरपळल्याने मृतदेहांची ओळख पटवणे कठीण झाले आहेत. यासाठी डीएनए चाचणी करण्यात येत असल्याचे स्थानिक अधिकाऱ्यांनी सांगितले.

आर्यन डॅलस येथे त्याच्या चुलत भावाला भेटून बेंटोनविले येथील घरी परतत होता. लोकेश आपल्या पत्नीला भेटण्यासाठी बेंटोनविलेला जात होता आणि दर्शिनी तिच्या काकांना भेटण्यासाठी जात होती. दर्शिनीच्या पालकांनी हिंदुस्थानचे केंद्रीय परराष्ट्र व्यवहार मंत्री एस जयशंकर यांच्याकडून मदतीचे आवाहन केले आहे.