मुलगा असूनही बाप झालास..; प्रसाद ओकच्या भावूक पोस्टची चर्चा

अभिनेता प्रसाद ओकचा मुलगा सार्थक याने स्वत:च्या वाढदिवशी बाबांना अत्यंत खास भेटवस्तू दिली. ही भेट पाहून प्रसाद आणि त्याची पत्नी मंजिरी दोघंही गहिवरले. इन्स्टाग्राम अकाऊंटवर या दोघांनी मुलासाठी भावूक पोस्ट लिहिली आहे. मुलगा असूनही बाप झालास, असं प्रसादने म्हटलंय. तर मंजिरीनेही दोन्ही मुलांबद्दल वाटणारा अभिमान व्यक्त केला. सार्थकने प्रसादला BMW ही अत्यंत महागातली गाडी भेट म्हणून दिली. त्याचा व्हिडीओसुद्धा प्रसादने सोशल मीडियावर पोस्ट केला आहे. या व्हिडीओमध्ये प्रसाद आणि मंजिरी यांच्या चेहऱ्यावरील आनंद स्पष्ट दिसून येत आहे.

प्रसाद ओकची पोस्ट-

‘सार्थक.. मुलगा असूनही ‘बाप’ झालास. अत्यंत अभिमान वाटतो तुझा. देव कायम तुझ्या पाठिशी राहो आणि तुझ्या सर्व इच्छा पूर्ण करो हीच प्रार्थना. वाढदिवसाच्या कोटी कोटी शुभेच्छा. खूप खूप खूप प्रेम,’ अशा शब्दांत प्रसादने भावना व्यक्त केल्या आहेत.

मंजिरी ओकची पोस्ट-

सार्थक जेव्हा गोष्ट तुमच्या बाबतीतली यायची.. तेव्हा आपला बाबा तसा थोडा भित्राच होता (अजूनही आहे). तुझ्या दुसऱ्या वाढदिवसाला (म्हणजे 3 सप्टेंबर 2002 ) जरा मी मागे लागले म्हणून बाबाची तयारी नसताना त्याने तुला ही सायकल सरप्राइज गिफ्ट म्हणून आणली होती. पण त्याला काळजी की तू ती चालवताना पडलास तर? तुला लागलं तर ? म्हणून कित्येक दिवस त्याने तुला ती सायकल घराखाली नेऊ पण दिली नाही (अर्थात आपण हळूच जायचो तो नसताना). त्यावर बसायचं कसं हे पण तुला कळत नव्हतं. मात्र तू बाबाला ती पहिल्यांदा चालवून दाखवल्यानंतरचा जो आनंद तुझ्या चेहऱ्यावर होता अगदी तोच आणि तसाच आनंद (लहान मुलासारखा) आज बाबाच्या चेहऱ्यावर आहे. त्याचं कारण म्हणजे, आज 22 वर्षांनी (3 सप्टेंबर 2024) तू बाबाला ही मोठ्ठी गाडी सरप्राईज गिफ्ट दिलीस. मी नको म्हणाले तर तू म्हणालास की बाबा स्वतःहून कधीच स्वतःसाठी मोठी गाडी घेणार नाही (त्याऐवजी छोटं घर घेऊ असंच म्हणेल). माझ्याकडे शब्द नाहियेत सार्थक. फक्त एवढंच सांगते की खूप खूप अभिमान वाटतो तुझा आणि मयंकचा पण. खूप मोठ्ठा हो. स्वामी तुझ्या सगळ्या इच्छा पूर्ण करोत. तुला वाढदिवसाच्या खूप खूप शुभेच्छा

 

View this post on Instagram

 

A post shared by PRASAD OAK : प्रसाद ओक (@oakprasad)

प्रसाद ओक लवकरच ‘धर्मवीर 2’ या चित्रपटातून प्रेक्षकांच्या भेटीला येणार आहे. ‘धर्मवीर’मध्ये प्रसादने आनंद दिघेंची भूमिका साकारली आहे. पहिल्या भागालाही प्रेक्षकांकडून दमदार प्रतिसाद मिळाला होता. हा चित्रपट येत्या 27 सप्टेंबरला जगभरात प्रदर्शित होणार आहे.