Nanded Rain – पावसाचा जोर वाढला, प्रशासनाचा नागरिकांना सतर्कतेचा इशारा

नांदेड जिल्ह्यात पावसाचा जोर वाढला असून, जिल्हा प्रशासन याबद्दल सतर्क आहे. नागरिकांनी काळजी घेवून पुराच्या पाण्यात किंवा नाल्यामध्ये जाऊ नये, तसेच पूर आलेल्या भागात सतर्कता बाळगावी, असे आवाहन जिल्हाधिकारी अभिजित राऊत यांनी केले आहे.

जिल्हाधिकार्‍यांनी दिलेल्या माहितीनुसार जिल्ह्यातील सर्वच नदी,नाल्यांना पूर आले असून, आपत्ती व्यवस्थापन व अन्य यंत्रणा सज्ज ठेवण्यात आली आहे. आज दुपारी चार वाजता पासदगाव पुलावरुन पाणी जात होते. मात्र प्रशासनातील कर्मचार्‍यांनी वारंवार सांगून सुध्दा एक व्यक्ती प्रशासनाचे काहीच न ऐकता सदरच्या पुलावरुन पुढे गेला तो वाहून गेला.  त्याचा शोध सुरु असल्याचे सांगण्यात आले. गोदावरी नदीकाठावर वसरणी पंचवटीनगर साईबाबा कमान जवळ असलेल्या इमारतीत दुसर्‍या मजल्यापर्यंत पाणी गेल्याने तेथील इमारतीत अडकलेल्या सर्वांना सुखरुप बाहेर काढण्यात आले आहे.

जिल्ह्यातील जनावरांच्या मृतांची आकडेवारी घेण्याची काम सुरु असून, आतापर्यंत 22 जनावरे यात मृत्यूमुखी पडल्याचे त्यांनी सांगितले. पासदगाव येथील नांदेड-मालेगाव रोडवर आसना नदीला पूर आल्याने या मार्गावरील वाहतूक बंद करण्यात आली आहे. कंधार तालुक्यातील बोळगा ते हाडोळती रोडवरील पुलावरुन पाणी जात आहे. कंधारेवाडी येथील पुलावरुन देखील पाणी वाहत असल्याने त्या मार्गावरील वाहतूक बंद करण्यात आली आहे. जाकापूर ते गोणार हा रस्ता गेल्या 48 तासापासून बंद आहे. अर्धापूर तालुक्यातील मेंढला, शेलगाव व सांगवी या गावाचा अद्यापही संपर्क तुटला असून, त्या भागातील ओढ्याच्या प्रवाहाचे पाणी वाढले असून, प्रशासन यावर लक्ष ठेवून आहे. महाटी ता.उमरी येथे पूर आला असून, वरिष्ठ अधिकारी त्याठिकाणी परिस्थितीवर नजर ठेवून आहेत.

हस्तरा गावात नदीच्या पुरामध्ये एक व्यक्ती अडकला होता त्याला पुरातून बाहेर काढण्यात आले आहे. तसेच उंचाडा कयाधू नदीला पूर आल्याने 25 लोक अडकले होते. तहसीलदारांच्या व आपत्ती व्यवस्थापनाच्या टिमने त्यांना सुरक्षितस्थळी बाहेर काढले आहे. सिरजखोड येथील गोदावरी नदीवरील पुलावरुन पाणी वाहत असल्याने बामणी, येळेगाव थडी, मनूर, संगम या गावचा धर्माबादकडे येणारा रस्ता बंद झाला असून, पर्यायी व्यवस्था म्हणुन हुंनगुंदा ते कुंडलवाडी मार्ग सुरु आहे. राहेगाव ते किक्की या दोन गावामधील पुलावरुन पाणी जात असल्याने लोकांना जाता येत नाही. पुलावरुन पाणी कमी होईपर्यंत कुणीही या पाण्यामधून जावू नये अशा सुचना प्रशासनाने दिल्याचे त्यांनी सांगितले. पूरपरिस्थितीवर जिल्हा प्रशासन पूर्णतः लक्ष ठेवून असल्याचे जिल्हाधिकार्‍यांनी सांगितले.