गेल्या दहा वर्षात महिला अत्याचारांच्या घटना वाढ, पंकजा मुंडे यांनी ठेवले गृहमंत्री देवेंद्र फडणवीस यांच्या कारभारावर बोट

निर्भया ते बदलापूर हा घटनाक्रम पाहता गेल्या दहा वर्षामध्ये महिला अत्याचारांच्या घटनात मोठी वाढ झाली असल्याबद्दल चिंता व्यक्त करीत भाजप आमदार पंकजा मुंडे यांनी गृहमंत्री देवेंद्र फडणवीस यांचा नाव न घेता त्यांच्या कारभाराबाबत नाराजी व्यक्त केली.

आमदार मुंडे या बुधवारी श्री विठ्ठल रुक्मिणीच्या दर्शनासाठी पंढरपूरला आल्या होत्या. यावेळी त्यांनी विठ्ठल रुक्मिणी दर्शन घेतल्यानंतर पत्रकारांशी संवाद साधला. बदलापूर अत्याचार घटनेबाबत त्यांनी तीव्र शब्दात नाराजी व्यक्त करताना आरोपीला भर चौकात फाशी द्यायला हवी अशी मागणी केली.

अत्याचाराच्या घटना सातत्याने वाढत अशी चिंता व्यक्त करताना त्या म्हणाल्या गेल्या दशकात यात मोठी वाढ झाल्याचे स्पष्ट करीत त्यांनी राज्याचे गृहमंत्री फडणवीस यांच्या कारभारावर अप्रत्यक्ष बोट ठेवले. छत्रपती शिवाजी महाराज यांच्या मालवण येथील स्मारकाविषयी बोलताना त्या म्हणाल्या की, शिवाजी महाराजांचा पुतळा कसा काय पडला याबाबत विचारणा केली असता, पुतळा कसा पडला याबाबत संबंधित मंत्री, अधिकारी आणि ज्यांनी पुतळा उभा करण्याचे काम केले, त्यांनी प्रतिक्रिया दिल्यानंतर मी अधिक बोलण्याची गरज नाही. लवकरच नवीन पुतळा बसवण्यात येईलव, असा विश्वास त्यांनी व्यक्त केला. यावेळी आमदार मुंडे यांच्या मातोश्री प्रज्ञा मुंडे याही सोबत होत्या. श्री विठ्ठल – रुक्मिणी मंदिर समितीच्या वतीने कार्यकारी अधिकारी राजेंद्र शेळके यांनी आमदार मुंडे यांचा सत्कार केला.