मुख्य आरोपींचे नगरमध्ये रक्षाबंधन सेलिब्रेशन?, फोटो झाले व्हायरल; ठेवीदारांमध्ये संताप

नगर अर्बन मल्टिस्टेट बँकेतील कोट्यवधींच्या घोटाळाप्रकरणी बँकेचे तत्कालीन चेअरमन दिवंगत माजी खासदार दिलीप गांधी यांच्या कुटुंबातील सदस्य आरोपी आहेत. गांधी कुटुंबातील सर्वच आरोपी अनेक महिन्यांपासून फरार असून, नुकतेच रक्षाबंधन सणानिमित्त सगळे कुटुंबीय एकत्र आले होते. स्व. गांधी यांच्या बंगल्यातच आरोपींनी रक्षाबंधन साजरे केल्याचे फोटो व्हायरल झाल्यामुळे खळबळ उडाली असून, पोलिसांच्या निक्रिय कारभाराबाबत ठेवीदार संताप व्यक्त करीत आहेत.

नगर अर्बन बँक घोटाळ्यातील आरोपी रक्षाबंधन साजरे करीत असल्याची माहिती पोलिसांना मिळताच त्यांनी गांधी यांच्या बंगल्याकडे धाव घेतली. मात्र, पोलीस पोहोचेपर्यंत सगळेच फरार झाल्याने पोलिसांना रिकाम्या हाती परतावे लागले. एका गंभीर आर्थिक घोटाळ्यातील आरोपी पोलिसांना सापडत नसल्याने ठेवीदार, बँक बचाव कृती समितीने तीव्र संताप व्यक्त केला आहे. कोणाच्या वरदहस्ताने आरोपींना एवढी मोकळीक दिली जात आहे? असा प्रश्न ठेवीदार करीत आहेत.

तब्बल 113 वर्षांची मोठी परंपरा असलेल्या नगर अर्बन बँकेचा बँकिंग परवाना तत्कालीन संचालक व काही अधिकाऱ्यांच्या भ्रष्ट कारभारामुळे संपुष्टात आला. रिझर्व्ह बँकेनेही कारवाई केली. यानंतर घोटाळ्याचा तपास होऊन आरोपींवर कायदेशीर कारवाई व्हावी, तसेच ठेवीदारांना त्यांच्या कोट्यवधींच्या ठेवी परत मिळाव्यात, यासाठी लढा सुरू आहे. मात्र, फॉरेन्सिक रिपोर्टमध्ये आरोपी निष्पन्न होऊनही पोलिसांना अद्यापि सगळ्या आरोपींच्या मुसक्या आवळता आलेल्या नाहीत. दिवंगत माजी खासदार दिलीप गांधी यांच्या परिवारातील मुख्य आरोपी मात्र खुलेआम नगरमध्ये बंगल्यावर येऊन सण साजरे करतात. त्याचे फोटोही सोशल मीडियावर व्हायरल होतात. एवढे होऊनही पोलिसांना ते सापडत नाहीत, हे आश्चर्यकारक असल्याचे बँक बचाव कृती समितीने म्हटले आहे.

वास्तविक आतापर्यंत पोलिसांनी या घोटाळ्याचा चांगल्या प्रकारे तपास केला आहे. आरोपी निष्पन्न झाले आहेत. काही भ्रष्ट संचालक, तसेच कर्जबुडव्यांना अटकही झालेली आहे. मात्र, कुठेतरी मध्येच माशी शिंकते आणि तपास रखडतो. त्यामुळे सर्वसामान्य ठेवीदारांना न्यायासाठी आणखी किती काळ प्रतीक्षा करावी लागणार आहे? असा प्रश्न उपस्थित होत आहे.