जम्मू-कश्मिरात उमेदवारीवरून भाजपमध्ये राडा; दिवसभरात तीन याद्या जाहीर, तिकीट नाकारलेल्यांचा तमाशा

जम्मू-कश्मीर विधानसभेसाठी उमेदवारीवरून भाजपमध्ये भाऊबंदकी उफाळून आली आहे. इच्छुकांनी तसेच तिकीट नाकारलेल्यांनी प्रचंड तमाशा केल्यामुळे भाजपवर दिवसभरात तीन वेळा यादी बदलण्याची वेळ आली. भाजपने सकाळी ४४ जागांसाठी उमेदवार जाहीर केले. उमेदवारांच्या राड्यामुळे सायंकाळपर्यंत यादीत केवळ १६ उमेदवार उरले. विशेष म्हणजे पंतप्रधान नरेंद्र मोदी यांच्या उपस्थितीत झालेल्या बैठकीत ही यादी अंतिम करण्यात आली होती!

जम्मू-कश्मीर विधानसभेच्या ९० जागांसाठी १८ सप्टेंबर, २५ सप्टेंबर आणि १ ऑक्टोबर अशा तीन टप्प्यात मतदान होणार असून ४ ऑक्टोबर रोजी मतमोजणी होणार आहे. विधानसभेच्या पहिल्या टप्प्यासाठी १५, दुसर्‍या टप्प्यासाठी १० आणि तिसर्‍या टप्प्यासाठी १९ उमेदवारांची यादी रविवारी पंतप्रधान नरेंद्र मोदी यांच्या उपस्थितीत झालेल्या बैठकीत अंतिम करण्यात आली. आज सकाळी ४४ जणांची यादी जाहीर होताच कश्मीर खोर्‍यात असंतोष उफाळून आला. प्रदेशाध्यक्ष रवींदर रैना यांच्या कार्यालयासमोर इच्छुक आणि तिकीट नाकारलेल्यांनी मोठी गर्दी केली. हा असंतोष पाहून भाजपचे प्रदेशाध्यक्ष रवींदर रैना हे आपल्या कक्षात पळून गेले.

पदाधिकार्‍यांमधील तीव्र असंतोष पाहून ४४ जणांच्या यादीत काटछाट करण्यात आली आणि दुसरी यादी जाहीर करण्यात आली. दुसर्‍या यादीवरूनही प्रचंड राडा झाला. पहिल्या यादीत नाव असलेले आणि दुसर्‍या यादीत नाव कापलेले इच्छुक संतापले. हा राडा वाढताच पुन्हा दुसर्‍या यादीत काटछाट करून १६ जणांची तिसरी यादी जाहीर करण्यात आली. या यादीवरूनही नाराजांनी तमाशा केला. शेवटी प्रदेशाध्यक्ष रवींदर रैना यांनी सध्या फक्त पहिल्या टप्प्यासाठीची यादी अंतिम करण्यावर भर देण्यात आला असून उर्वरित टप्प्यांचा नंतर विचार करण्यात येईल, असे सांगितले. परंतु पदाधिकार्‍यांचे समाधान झाले नाही. नाराजांनी घोषणाबाजी करत कार्यालय डोक्यावर घेतले.