दिवंगत दिलीप गांधी यांच्या घराची झाडाझडती, नगर अर्बन बँक घोटाळा

नगर अर्बन बँक घोटाळा प्रकरणात संशयितांच्या तपासणीसाठी आर्थिक गुन्हे शाखेच्या पथकाने शुक्रवारी (दि. 23) दुपारी माजी खासदार स्व. दिलीप गांधी यांच्या घराची झाडाझडती घेतली. माजी नगरसेवक सुवेंद्र गांधी यांचा या प्रकरणात सहभाग असल्याचा संशय आहे. त्यांच्या शोधासाठी ही झडती घेण्यात आली. मात्र, ते घरात आढळून आले नाहीत, असे उपअधीक्षक अमोल भारती यांनी सांगितले.

आर्थिक गुन्हे शाखेमार्फत अर्बन बँक कर्ज घोटाळ्याचा तपास सुरू आहे. सुमारे 291 कोटींचा गैरव्यवहार उघडकीस आलेला असून, फॉरेन्सिक ऑडीटमध्ये संशयितांच्या नावाने झालेल्या व्यवहाराची माहिती समोर आली आहे. या पार्श्वभूमीवर संशयितांची चौकशी व त्यांच्यावर कारवाई सुरू आहे.

स्व. दिलीप गांधी यांच्या घरी काही सदस्य आल्याची माहिती आर्थिक गुन्हे शाखेला मिळाली होती. त्यामुळे सहायक पोलीस निरीक्षक युवराज आठरे यांनी पथकासह जाऊन घराची झडती घेतली. मात्र, कुणीही आढळून आले नाहीत, असे उपअधीक्षक भारती यांनी सांगितले.

नगर अर्बन बँकेशी संबंधित गुह्यांच्या तपासावर कोणीतरी प्रभाव टाकत आहे, असे निरीक्षण छत्रपती संभाजीनगर खंडपीठाने नोंदविले आहे. यानंतर पोलिसांनी संशयितांच्या अटकेसाठी हालचाली सुरू केल्याचे दिसून येत आहे. गेल्या अनेक दिवसांपासून या संदर्भातील तपास थंडावला होता. पुन्हा तपासाला वेग आला असून, संशयितांना अटक करून न्याय मिळण्याची अपेक्षा ठेवीदारांकडून व्यक्त केली जात आहे.