Amravati accident news – गाईला वाचवण्याच्या प्रयत्नात शिवशाही पलटी; एकाचा मृत्यू, 28 जखमी

अमरावती-नागपूर महामार्गावर शिवशाहीचा भीषण अपघात झाला आहे. गाईला वाचवण्याच्या प्रयत्न शिवशाही पलटी झाली. या अपघातात एका प्रवाशाचा मृत्यू झाला असून 28 जण जखमी झाले आहेत.

मिळालेल्या माहितीनुसार, रविवारी सकाळच्या सुमारास हा अपघात झाला. नागपूरहून ही शिवशाही बस अकोल्याच्या दिशेने मार्गस्थ झाली होती. मात्र अमरावती-नागपूर महामार्गावर क्रमांक 6 वर बसच्या समोर एक गाय आली. तिला वाचवण्याचा प्रयत्न शिवशाही बस चालकाने केला. यादरम्यान त्याचे बसवरील नियंत्रण सुटले आणि बस रस्त्याच्या कडेला पलटी झाली. यात एका प्रवाशाचा मृत्यू झाला, तर 28 जण जखमी झाले. जखमींना उपचारांसाठी जवळच्या रुग्णालयात दाखल करण्यात आले. सुदैवाने कोणालाही गंभीर दुखापत झालेली नाही.

सदर अपघातामुळे अमरावती-नागपूर महामार्गावर वाहतुकीची कोंडी झाली होती. महामार्गावर वाहनांच्या लांबच लांब रांगा लागल्या होत्या. अपघाताची माहिती मिळताच पोलीस प्रशासनाने घटनास्थळी धाव घेतली आणि त्यानंतर क्रेनच्या मदतीने शिवशाही सरळ करून महामार्गा सुरू करण्यात आला.

नक्की काय घडलं?

दरम्यान, या अपघातात शिवशाहीच्या चालकालाही दुखापत झाली आहे. हा अपघात नक्की कसा झाला याबाबत माहिती देताने त्याने सांगितले की, नागपूरहून अकोल्याकडे बस घेऊन निघालो होतो. त्याचवेळी महामार्गावर अचानक बससमोर एक गाय आली. गाईला वाचवण्यासाठी करकचून ब्रेक दाखले आणि बसवर नियंत्रण मिळवण्याचा प्रयत्न केला. मात्र अचानक घडलेल्या घडामोडीत बस पलटी झाली. हा अपघात झाला तेव्हा बसमध्ये 35 प्रवासी होते.