पालिकेने पाच वर्षांत 2360 कोटींची मुदत ठेव मोडली, सहा वेळा बेस्टला मदत देण्यासाठी पैसे काढले

पालिकेने पाच वर्षांत 2360 कोटींची मुदत ठेव मुदतपूर्व मोडली आहे. यामध्ये ‘बेस्ट’ला मदत करण्यासाठी सहा वेळा मुदत ठेवीतून पैसे काढले आहेत. माहिती अधिकारातून ही माहिती समोर आली.

आरटीआय कार्यकर्ते अनिल गलगली यांनी याबाबत माहिती मागितली होती. पालिकेच्या उप प्रमुख लेखापालने  दिलेल्या माहितीनुसार 2360 कोटी 20 लाख 19 हजार रुपये अशी मोडलेल्या मुदत ठेवींची रक्कम आहे. ‘बेस्ट’ला मुदत ठेवीमधून मदत करताना 2019-20 च्या 19 ऑगस्ट 2019 रोजी 250 कोटी आणि 113 कोटी अशा 2 मुदत ठेवी मोडल्या. 21 ऑगस्ट 2019 रोजी 115 कोटींची मुदत ठेव पुन्हा बेस्ट अधिदान करण्याकरिता मोडली. 2022-23 च्या 25 मार्च 2022 रोजी बेस्ट अधिदान करण्याकरिता एकाच दिवशी 3 मुदत ठेवी अनुक्रमे 100 कोटी, 92.06 कोटी आणि 87.06 कोटी बेस्ट अधिदान करण्याकरिता मोडल्या.

कर्मचाऱ्यांसाठी मोडली; 645.20 कोटी काढले

n कर्मचाऱ्यांचे निवृत्ती वेतनधारकांचे ऑगस्ट महिन्याचे वेतन/ निवृत्तीवेतनाचे अधिदान गणेशोत्सव सणापूर्वी दिनांक 29 ऑगस्ट 2022 रोजी करण्यासाठी युनियन बँक ऑफ इंडियातून 29 ऑगस्ट 2022 रोजी 645,20,07,000 इतकी मुदत ठेव मोडली.

n तर एमएमआरडीएला अधिदान करण्यासाठी स्टेट बँक ऑफ इंडियात जमा असलेली 949,50,00,000 इतकी मुदत ठेव दिनांक 15 मार्च 2024 रोजी मोडली आहे.