युवासेनाप्रमुख आदित्य ठाकरे रविवार, सोमवार छत्रपती संभाजीनगर दौर्‍यावर; शिवसंकल्प मेळाव्यातून साधणार संवाद

25 ऑगस्ट – सिल्लोड, छत्रपती संभाजीनगर पश्चिम
26 ऑगस्ट – पैठण, गंगापूर, वैजापूर, कन्नड

शिवसेना (उद्धव बाळासाहेब ठाकरे) नेते, युवासेनाप्रमुख, आमदार आदित्य ठाकरे दोन दिवस छत्रपती संभाजीनगर दौर्‍यावर येत आहेत. शिवसंकल्प मेळाव्याच्या माध्यमातून ते शिवसेना पदाधिकारी तसेच नागरिकांशी संवाद साधणार आहेत.

आगामी विधानसभा निवडणुकीच्या पार्श्वभूमीवर शिवसेना नेते, युवासेनाप्रमुख आमदार आदित्य ठाकरे हे 25 आणि 26 ऑगस्ट रोजी छत्रपती संभाजीनगर दौर्‍यावर येत आहेत. यानिमित्ताने त्यांच्या उपस्थितीत शिवसंकल्प मेळाव्याचे आयोजन करण्यात आले आहे. रविवारी 25 ऑगस्ट रोजी दुपारी 2 वाजता सिल्लोड येथे प्रियदर्शिनी चौकात आणि त्यानंतर सायंकाळी 6 वाजता छत्रपती संभाजीनगर येथे संत एकनाथ रंगमंदिरात शिवसंकल्प मेळावा होणार आहे.

सोमवारी 26 ऑगस्ट रोजी सकाळी 10 वाजता पैठण येथे माहेश्वरी धर्मशाळेत त्यानंतर दुपारी 12.15 वाजता लासूर स्टेशन येथे लक्ष्मीनारायण लॉन्स येथे शिवसंकल्प मेळावा होणार आहे. दुपारी 2 वाजता वैजापूर येथे त्यानंतर सायंकाळी 6 वाजता कन्नड येथे शिवसंकल्प मेळाव्याच्या माध्यमातून आदित्य ठाकरे जनतेशी संवाद साधणार आहेत. या मेळाव्यास शिवसेना पदाधिकारी, नागरिकांनी उपस्थित राहावे, असे आवाहन शिवसेना नेते, विरोधी पक्षनेते अंबादास दानवे, शिवसेना नेते चंद्रकांत खैरे, जिल्हाप्रमुख किशनचंद तनवाणी, राजेंद्र राठोड यांनी केले आहे.