Chandrapur News – धक्कादायक! प्रसाधनगृहात मनोरुग्ण तरुणीवर बलात्कार, अत्याचाराचा व्हिडिओ व्हायरल

कोलकाता, बदलापूर, मुंबई, अकोला आणि कोल्हापूर सहीत देशाच्या विविध भागांमध्ये बलात्काराच्या गंभीर घटना गेल्या काही दिवसांमध्ये घडल्या आहेत. त्यामुळे नागरिकांमध्ये संतापाची लाट आहे. अशातच चंद्रपूरमध्ये मनोरुग्ण तरुणीवर बलात्कार झाल्याची संतापजनक घटना उघडकीस आली आहे.

चंद्रपूर जिल्हातील एका मनोरुग्ण तरुणीवर बलात्कार झाल्याची घटना जिल्हातील नागभीड येथे घडली आहे. या घटनेमुळे संताप व्यक्त केला जात आहे. याप्रकरणी पोलिसांनी पाच आरोपींना अटक केली असून ही घटना सोमवारी (12 ऑगस्ट) मध्यरात्री घडली आहे. पीडित तरुणी एकटी असल्याचे पाहून तिला आरोपींनी बसस्थानकातील प्रसाधनगृहात नेले आणि बळजबरीने अत्याचार केला. हा अत्याचार सुरू असतानाच दुसऱ्याने व्हिडिओ काढला आणि मित्राला पाठवला. त्याने हा व्हिडिओ समाज माध्यमांवर व्हायरल केला आणि शहरात एकच खळबळ उडाली. यासंदर्भात येथील काही सामाजिक संघटनांनी पुढाकार घेत आज (23 ऑगस्ट) उपविभागीय अधिकारी दिनकर ठोसरे यांना निवेदन देऊन आरोपींना अटक करून कारवाई करण्याची मागणी केली. चित्रफीतीत दिसणाऱ्या आरोपींचा शोध घेण्यासाठी पोलिसांनी वेगवेगळी पथके तयार केली आणि काही तासात पाच आरोपींना अटक केली आहे. आरोपींवर भारतीय दंड संहितेच्या कलम 64 (2), (क), 70(1) 87, 126(2), 3 (5) सहकलम 67,(अ) अन्वये गुन्हा दाखल केला आहे. दरम्यान पोलिसांनी पीडित तरुणीचा शोध घेऊन तिला वैद्यकीय तपासणीसाठी चंद्रपूर येथे पाठवले आहे. पोलीस अधीक्षक मुमक्का सुदर्शन यांनी नागभीड येथे भेट देत तपासासंदर्भात मार्गदर्शन केले. अधिक तपास नागभीड पोलीस स्टेशन चे पोलीस निरीक्षक अमोल काचोरे करीत आहेत.