मानेवर किडा पडल्याची बोलबच्चन देत तो महिलांचे दागिने उडवायचा, 21 गुन्हे दाखल असलेल्या आरोपीला कोलकाता येथून अटक

वृद्ध महिलांना बोलण्यात गुंतवून अथवा मानेवर किडा पडल्याचे सांगून गळ्यातील सोन्याचे दागिने हातोहात उडवणाऱ्या चोरट्याने मीरा- भाईंदरमध्ये धुमाकूळ घातला होता. या बोलबच्चनगिरी करणाऱ्या अट्टल चोरट्याने पोलिसांसमोर आव्हान उभे केले होते. महिलाही एकट्या बाहेर पडण्यास धजावत नव्हत्या. अखेर सीसीटीव्ही फुटेजच्या आधारे पोलिसांनी प्रदीप बॅनर्जी (41) रा. वाघराल पाडा, बोयदा पाडा वसई याला कोलकाता येथून अटक केली आहे. त्याच्यावर विविध पोलीस ठाण्यात चेन स्नॅचिंगचे 21 गुन्हे दाखल आहेत.

मंदिर परिसरात रेकी करून प्रदीप बॅनर्जी वृद्ध महिलांच्या गळ्यातील दागिने लंपास करायचा, चेन स्नॅचिंग करताना एकट्या वयोवृद्ध महिलांना हेरून बोलबच्चन करत बोलण्यात गुंतवून ठेवायचा. याचवेळी तो मानेवर किडा पडल्याचे सांगून हातोहात गळ्यातील दागिने लंपास करायचा. नयानगर, शांतीनगर, सृष्टी, पेणकर पाडा, मिरागाव, चेकनाका आणि दहिसर, बोरिवली येथील शेकडो सीसीटीव्ही फुटेज तांत्रिक तपास करून शेवटी आरोपी बॅनर्जीला त्याच्या कोलकाता या मूळ शहरातून अटक करण्यात आली. आरोपीवर एकूण 21 गुन्हे दाखल आहेत.

Tags:

About The Author

Manisha Thorat- Pisal

सौ. मनिषा-थोरात-पिसाळ गेल्या १२ वर्षांपासून पत्रकारिता क्षेत्रात कार्यरत आहेत. ‘‘न्यूज एक्सप्रसे मराठी’’ या पुणे जिल्ह्यातील आघाडीच्या न्यूज पोर्टलच्या कार्यकारी संपादक म्हणून जबाबदारी सांभाळत आहेत. सामाजिक, राजकीय, शैक्षणिक आणि औद्योगिक क्षेत्रातील विविध समाजपयोगी उपक्रमांमध्ये त्यांनी योगदान दिले आहे.