कोलकाता डॉक्टर बलात्कार प्रकरणाची सुप्रीम कोर्टाने स्वतःहून घेतली दखल; मंगळवारी सुनावणी

कोलकाता येथील ट्रेनी डॉक्टरवरील बलात्कार व हत्या प्रकरणाची सर्वोच्च न्यायालयाने स्वतःहून दखल घेतली आहे. सरन्यायाधीश धनंजय चंद्रचूड यांच्या नेतृत्वाखालील खंडपीठाने याप्रकरणी मंगळवारी सुनावणी घेण्याची तयारी दर्शवली आहे. महिला डॉक्टरवरील अत्याचाराच्या घटनेचे संपूर्ण देशभरात तीव्र पडसाद उमटले आहेत. त्या पार्श्वभूमीवर न्यायालयाने महिला डॉक्टरांच्या सुरक्षेचा विषय गांभीर्याने विचारात घेतला आहे.

कोलकात्यातील घटनेची न्यायालयाने दखल घ्यावी अशी विनंती करणारे पत्र सर्वोच्च न्यायालयाला पाठवले गेले होते. त्याची गंभीर दखल घेत न्यायालयाने शनिवारी सुमोटो याचिका दाखल करून घेतली.

सरन्यायाधीश चंद्रचूड यांच्या नेतृत्वाखालील खंडपीठामध्ये न्यायमूर्ती जे बी पारडीवाला आणि न्यायमूर्ती मनोज मिश्रा यांचा समावेश असणार आहे.

कोलकात्यातील आरजी मेडिकल कॉलेज आणि हॉस्पिटलमध्ये 9 ऑगस्ट रोजी 31 वर्षीय ट्रेनी डॉक्टरवर बलात्कार आणि हत्येची घटना घडली होती. या घटनेचे देशभरात तीव्र पडसाद उमटले आहे. देशभरातील डॉक्टरांनी घटनेचा तीव्र निषेध केला आहे.

घटनेच्या एका दिवसानंतर पोलिसांनी आरोपी संजय रॉय याला अटक केली. यानंतर पोलीस तपासातील त्रुटींचा हवाला देऊन, कोलकाता उच्च न्यायालयाने हे प्रकरण केंद्रीय अन्वेषण ब्युरो (सीबीआय) कडे वर्ग केले.

Tags:

About The Author

Manisha Thorat- Pisal

सौ. मनिषा-थोरात-पिसाळ गेल्या १२ वर्षांपासून पत्रकारिता क्षेत्रात कार्यरत आहेत. ‘‘न्यूज एक्सप्रसे मराठी’’ या पुणे जिल्ह्यातील आघाडीच्या न्यूज पोर्टलच्या कार्यकारी संपादक म्हणून जबाबदारी सांभाळत आहेत. सामाजिक, राजकीय, शैक्षणिक आणि औद्योगिक क्षेत्रातील विविध समाजपयोगी उपक्रमांमध्ये त्यांनी योगदान दिले आहे.