बृजभूषण सिंहना पुन्हा धोबीपछाड, संजय सिंह यांच्या कुस्ती महासंघाचे कामकाज रोखले

पॅरिस ऑलिम्पिक स्पर्धेमध्ये वजन वाढल्याने पदरी निराशा पडलेल्या विनेश फोगाटसह अन्य कुस्तीपटूंनी न्यायालयीन लढाईमध्ये हिंदुस्थानी कुस्ती महासंघाला चितपट केले आहे. बृजभूषण सिंह यांनी महासंघाचे अध्यक्षपद सोडल्यानंतर झालेल्या निवडणुकीत त्यांचे निकटवर्तीय संजय सिंह अध्यक्ष झाले होते. या निवडीविरुद्ध कुस्तीपटूंनी न्यायालयात दाद मागितली होती. दिल्ली उच्च न्यायालयाने निकाल देताना या निवडणुकीचा निकाल रद्द ठरवला आहे. त्यामुळे संजय सिंह यांना महासंघाच्या अध्यक्षपदावर कायम राहता येणार नसल्याने हा बृजभूषण यांना सर्वात मोठा धक्का आहे. तसेच हिंदुस्थानी ऑलिम्पिक संघटनेला (आयओए) अस्थायी समिती नेमण्यासही सांगितले आहे.

विनेश फोगाट, साक्षी मलिक आणि बजरंग पुनियासह अन्य कुस्तीपटूंनी काही महिन्यांपूर्वी बृजभूषण सिंह यांच्याविरोधात आंदोलन केले होते. बृजभूषण सिंह यांच्यावर कारवाईची मागणी खेळाडूंकडून करण्यात आली होती. त्यानंतर बृजभूषण यांनी कुस्ती महासंघाच्या अध्यक्षपदाचा राजीनामा दिला होता. राजीनामा दिल्यानंतर झालेल्या निवडणुकीत त्यांनी संजय सिंह यांना अध्यक्षपदाच्या रिंगणात उतरवले. या निवडणुकीत संजय सिंह विजयी झाले. ते बृजभूषण यांचेच निकटवर्तीय असल्यामुळे कुस्तीपटूंनी उच्च न्यायालयात दाद मागितली होती. या याचिकेवर उच्च न्यायालयाने शुक्रवारी निकाल दिला.

संजय सिंह यांची कार्यकारिणी आता विघटित केली जाणार आहे. डिसेंबरमध्ये ज्या निवडणुका झाल्या त्या रद्द ठरवण्यात येत आहेत. त्यामुळे आता अस्थायी समिती कुस्तीबाबतचे यापुढील निर्णय घेईल, असे दिल्ली उच्च न्यायालयाने दिलेल्या निकालात नमूद करण्यात आले आहे. त्यामुळे संजय सिंह यांना कुस्ती महासंघाचे अध्यक्षपद सोडावे लागणार आहे.

कुस्ती महासंघ आव्हान देणार

कुस्तीपटूंच्या याचिकेवर निर्णय देताना दिल्ली उच्च न्यायालयाने हिंदुस्थानी कुस्ती महासंघाचे कामकाज रोखण्याचे आदेश दिल्यानंतर महासंघाने या निर्णयाला आव्हान देण्याचा निर्णय घेतला आहे. न्यायालयाच्या निर्णयानंतर जागतिक अजिंक्यपदाच्या यजमानपदावर संकट ओढावले आहे. याप्रकरणी कुस्ती महासंघ जागतिक कुस्ती महासंघ आणि आंतरराष्ट्रीय ऑलिम्पिक संघटना यांच्याशी संपर्क साधणार असल्याचे कुस्ती महासंघाचे अध्यक्ष संजय सिंह यांनी सांगितले.