कॅन्सरशी झुंज देणाऱ्या हिना खानने स्वत:च्याच केसांपासून बनवला विग

'ये रिश्ता क्या कहलाता है' या मालिकेतून घराघरात पोहोचलेली अभिनेत्री हिना खान ब्रेस्ट कॅन्सरशी झुंज देत आहे. मुंबईतल कोकिलाबेन रुग्णालयात तिच्यावर उपचार सुरू असून सोशल मीडियावर ती विविध पोस्ट लिहित आहे. किमोथेरेपीमुळे केस गळतात, त्यामुळे हिनाने आधीच तिचे सर्व केस कापले होते. आता त्याच केसांपासून तिने विग बनवला आहे.

नुकत्याच एका पोस्टद्वारे हिनाने याबद्दलची माहिती दिली. 'कॅन्सरचं निदान होताच मला समजलं होतं की केस गमवावे लागणार आहेत. त्यामुळे मी आधीच माझे केस कापून टाकले. त्याच केसांपासून मी विग बनवण्याचा निर्णय घेतला. हा निर्णय खूप ताकद देणारा ठरला आहे', असं तिने म्हटलंय.

कॅन्सरचा सामना करणाऱ्या इतर महिलांनाही हिनाने संदेश दिला आहे. 'जर तुम्हाला माझा हा निर्णय योग्य वाटला असेल तर तुम्हीसुद्धा असंच करा, हा सल्ला मी देईन. यामुळे किमान एक गोष्ट तरी सोपी होईल आणि तुम्हाला बरं वाटेल', असं तिने लिहिलं आहे.

किमोथेरेपीदरम्यान केस गळतात. त्यामुळे हिनाने आधीच तिचे लांब केस कापून छोटे केले होते. त्यानंतर काही दिवसांपूर्वी तिने पूर्णपणे टक्कल केलं होतं. आता त्याच केसांपासून विग बनवल्याचं सांगत हिनाने हा व्हिडीओ पोस्ट केला आहे.

हिना सध्या कर्करोगावरील उपचार घेत आहे. सर्जरीनंतर तिच्यावर किमोथेरेपी सुरू आहे. पहिल्या किमोनंतर हिनाच्या शरीरावर काही डागसुद्धा दिसून आले. याविषयी नेटकऱ्यांनी काळजी व्यक्त केली होती. मात्र सकारात्मक विचार डोक्यात ठेवून या सर्व गोष्टींना सामोरं जात असल्याचं हिनाने चाहत्यांना सांगितलं आहे.