यंदा परीक्षा लवकर होणार; दहावी आणि बारावीच्या परीक्षांचे वेळापत्रक जाहीर

यंदाच्या दहावी आणि बारवीच्या परीक्षांचे वेळापत्रक महाराष्ट्र राज्य माध्यमिक व उच्च माध्यमिक मंडळाने जाहीर केले आहे. या जाहीर केलेल्या वेळापत्रकाप्रमाणे बारावीच्या परीक्षा 11 फेब्रुवारी ते 18 मार्च या काळात होणार आहेत. तर दहावीच्या परीक्षा 21 फेब्रुवारी ते 17 मार्च या काळात होणार आहेत. महाराष्ट्र राज्य माध्यमिक व उच्च माध्यमिक मंडळाने जाहीर केलेल्या प्रसिद्धीपत्राकाद्वारे ही माहिती देण्यात आली आहे.

महाराष्ट्र राज्य माध्यमिक व उच्च माध्यमिक शिक्षण मंडळाच्या वतीने पुणे, नागपूर, छत्रपती संभाजीनगर, मुंबई, कोल्हापूर, अमरावती, नाशिक, लातूर व कोकण या नऊ विभागीय मंडळामार्फत घेण्यात येणारी उच्च माध्यमिक प्रमाणपत्र (इ.12वी) परीक्षा दरवर्षी फेब्रुवारी महिन्याच्या तिसऱ्या आठवडयात तर माध्यमिक शालान्त प्रमाणपत्र (इ.10वी) परीक्षा मार्चच्या पहिल्या आठवडयात आयोजित केल्या जातात. या परीक्षांचा ऑनलाईन सिकाल अनुक्रमे मे अखेरीस व जूनच्या पहिल्या आठवडयात जाहीर करण्यात येतो. त्यानंतर अनुत्तीर्ण तसेच श्रेणीसुधार अंतर्गत प्रविष्ट विद्यार्थ्यांसाठी जुलै-ऑगस्टची पुरवणी परीक्षा साधारणतः जुलैच्या तिसऱ्या आठवडयापासून घेतली जाते.

विद्यार्थ्यांच्या पुढील शैक्षणिक वर्षाची प्रवेश प्रक्रिया वेळेवर होणे, व्यावसायिक अभ्यासकमाच्या प्रवेश परीक्षा या मंडळाच्या परीक्षेनंतर आयोजित केल्या जात असल्याने अशा परीक्षांचा अभ्यास करण्यास विद्यार्थ्यांना पुरेसा वेळ मिळावा तसेच पुरवणी परीक्षा लवकर घेवून त्याचा निकाल लवकर जाहीर करणे, या बाबींचा सारासार विचार करता 2025 ची फेब्रुवारी-मार्चमध्ये घेण्यात येणारी बारावी आणि दहावीची परीक्षा नेहमीपेक्षा 18 ते 10 दिवस आधी आयोजित करण्याचा मंडळाचा मानस असून त्याअनुषंगाने लेखी, प्रात्यक्षिक व इतर परीक्षा पुढील तारखांना घेण्याचे नियोजित आहे.

उच्च माध्यमिक प्रमाणपत्र (इ.बारावी) परीक्षा (सर्वसाधारण व व्दिलक्षी विषय) व उच्च माध्यमिक व्यवसाय अभ्यासकम मंगळवार, दि. 11 फेब्रुवारी 2025 ते मंगळवार, दि. 18 मार्च 2025 प्रात्यक्षिक, श्रेणी, तोंडी परीक्षा व अंतर्गत मूल्यमापन शुकवार, 24 जानेवारी 2025 ते सोमवार 10 फेब्रुवारी 2025 या काळात होणार आहेत.

माध्यमिक शालान्त प्रमाणपत्र (दहावी) परीक्षा शुक्रवार 21 फेब्रुवारी 2025 ते सोमवार 17 मार्च 2025 प्रात्यक्षिक, श्रेणी, तोंडी परीक्षा व अंतर्गत मूल्यमापन परीक्षा सोमवार 03 फेब्रुवारी 2025 ते गुरूवार 20 फेब्रुवारी 2025 या काळात होणार आहेत. शाळा / कनिष्ठ महाविद्यालय व विद्यार्थी यांना अभ्यासक्रमाचे नियोजन करण्याचे हेतूने तसेच
विद्यार्थ्यांच्या मनावरील ताण कमी होण्याचे दृष्टीने फेब्रुवारी-मार्च 2025 च्या प्रात्यक्षिक व लेखी परीक्षेच्या वरीलप्रमाणे नियोजित तारखा जाहीर करण्यात येत आहे.
प्रात्यक्षिक परीक्षा, श्रेणी, तोंडी, अंतर्गत मूल्यमापन परीक्षा व लेखी परीक्षांचे सविस्तर विषयांचे वेळापत्रक स्वतंत्रपणे मंडळाच्या संकेतस्थळावर यथावकाश जाहीर करण्यात येईल.

या तारखांबाबत काही सूचना, हरकती असल्यास त्या शुक्रवार 23-8-2024 पर्यंत [email protected] या संकेत स्थळावर पाठवाव्यात. या तारखेनंतर प्राप्त होणाऱ्या सूचनांवर विचार केला जाणार नाह,असे महाराष्ट्र राज्य माध्यमिक व उच्च माध्यमिक मंडळाने स्पष्ट केले आहे.