Worli Hit & Run : मिहीर शहा दारूच्या नशेत नव्हता! न्यायवैद्यक प्रयोगशाळेचा धक्कादायक निष्कर्ष

वरळी परिसरात बेदरकार ड्रायव्हिंग करून कावेरी नाखवा यांचा बळी घेणारा मिहीर शहा दारूच्या नशेत नव्हता, असा धक्कादायक निष्कर्ष न्यायवैद्यक प्रयोगशाळेच्या अहवालातून समोर आला आहे. घटनेच्या काही तास आधी मित्रांसोबत जुहू येथील बारमध्ये पार्टी करून मिहीर दक्षिण मुंबईच्या दिशेने वळला होता. पुढील काही तासांतच हीट अँड रनची घटना घडली होती. त्यामुळे तो दारूच्या नशेत असल्याच्या दाट शक्यतेतून त्याच्या रक्त आणि युरीनचे नमुने न्यायवैद्यक तपासणीसाठी पाठवण्यात आले होते. या तपासणीच्या अहवालात मिहिरच्या रक्त आणि लघवीच्या नमुन्यात दारूचा अंश सापडला नसल्याने आश्चर्य व्यक्त होत आहे. पोलीस दलातील वरिष्ठ सूत्रांनी ही माहिती दिली आहे.

वरळी येथील अट्रिया मॉलसमोर 7 जुलै रोजी भरधाव बीएमडब्लूने दुचाकीला जोरदार धडक दिली होती. या भीषण अपघातात दुचाकीवरील कावेरी नाखवा ही महिलेचा मृत्यू झाला होता. अपघातानंतर प्रमुख संशयित आरोपी मिहीर शहा हा फरार झाला होता. त्यानंतर तीन दिवसांनी त्याला विरार येथून अटक करण्यात आली होती.

वरळी पोलिसांनी केलेल्या चौकशीत मिहीर शाहने अपघाताच्या वेळी मद्यप्राशन करुन कार चालवत असल्याचे तोंडी मान्य केले होते. यानंतर वरळी पोलिसांनी मद्यपान करून गाडी चालवल्यामुळे मिहीरचे ड्रायव्हिंग लायसन्स कायमचे रद्द करण्याचे पत्र आरटीओला पाठवण्यात आले.

या प्रकरणी पोलिसांनी मिहीर शहाचे वडील राजेश शहा यांनाही अटक केली होती. याशिवाय मिहीरसोबत कारमध्ये उपस्थित असलेल्या राजऋषी राजेंद्र सिंह बडावत यालाही अटक करण्यात आली आहे. मात्र, फॉरेन्सिक तपासणीचा अहवाल निगेटिव्ह आल्याने आश्चर्य व्यक्त होत आहे.