‘कुणीतरी येणार गं’वर थिरकले ‘अशी ही बनवाबनवी’चे कलाकार; व्हिडीओवर कमेंट्सचा वर्षाव

मराठी सिनेसृष्टीच्या इतिहासात तुफान गाजलेला आणि आजही अनेकांचा लोकप्रिय असलेला चित्रपट म्हणजे ‘अशी ही बनवाबनवी’. या चित्रपटाला तीन दशकं उलटून गेली आहेत, तरी आजही त्यातील गाणी, डायलॉग्स, भूमिका प्रेक्षकांच्या स्मरणात कायम आहेत. इतका काळ होऊनही या चित्रपटाचा चाहतावर्ग तसूभरही कमी झाला नाही. यातल्या प्रत्येक कलाकाराने आपल्या दमदार अभिनयकौशल्याने चाहत्यांची मनं जिंकली आहेत. आता तब्बल 35 वर्षांनंतर या चित्रपटातील काही कलाकार एकाच मंचावर आले. यावेळी त्यांनी ‘कुणीतरी येणार गं’ या गाण्यावर पुन्हा एकदा ठेका धरला. त्याचाच व्हिडीओ सध्या सोशल मीडियावर व्हायरल होत आहे.

एका कार्यक्रमानिमित्त अभिनेता सचिन पिळगांवकर, त्यांची पत्नी सुप्रिया पिळगांवकर, निवेदिता सराफ आणि अश्विनी भावे हे चौघं एकाच मंचावर उपस्थित होते. यावेळी त्यांनी ‘कुणीतरी येणार गं’ या गाण्यावर एकत्र डान्स केला. निवेदिता यांच्या फॅनपेजवर हा व्हिडीओ पोस्ट करण्यात आला आहे. ‘डोहाळे पुरवा..’ या कडव्याने व्हिडीओची सुरुवात होते. तेव्हा सुप्रिया पिळगांवकर या सचिन यांच्याकडे हावभाव करून डान्सची सुरुवात करतात. त्यानंतर सचिन पिळगांवकर ‘कुणीतरी येणार गं’वर ठेका धरतात. त्यांच्यापाठोपाठ सुप्रिया, निवेदिता आणि अश्विनी यासुद्धा नाचू लागतात. या व्हिडीओवर नेटकऱ्यांकडून लाइक्स आणि कमेंट्सचा वर्षाव होत आहे.

 

View this post on Instagram

 

A post shared by @__niveditasaraf__fc (@_nivedita_joshi_saraf_)

‘ऑल टाइम फेव्हरेट मराठी चित्रपट. लक्ष्मीकांत बेर्डे सरांची आठवण येते’, असं एकाने लिहिलं. तर ‘असा चित्रपट पुन्हा होणे नाही’ असं दुसऱ्याने म्हटलंय. ‘हा चित्रपट एकदा काय हजार वेळा पाहिला तरी मन भरत नाही’, असं एका युजरने लिहिलं आहे. ‘सुवर्णकाळ’, असंही नेटकऱ्यांनी म्हटलं आहे.

‘लिंबूचं मटण’, ‘धनंजय माने इथेच राहतात का?’, ’70 रुपये वारले’ असे या चित्रपटातील अनेक संवाद आजही प्रेक्षकांना तोंडपाठ आहेत. काही चित्रपट वारंवार पाहिले तरी त्यातली मजा कधीच कमी होत नाही, असाच काहीसा अनुभव ‘अशी ही बनवाबनवी’ चित्रपट पाहताना येतो. म्हणूनच या कलाकारांना पुन्हा एकत्र पाहिल्यावर चाहत्यांना खूपच आनंद झाला. तो आनंद त्यांनी लाइक्स आणि कमेंट्सच्या रुपात व्यक्त केला.