‘नवरी मिळे हिटलरला’मध्ये मोठा ट्विस्ट; लीलाच्या मंगळागौरीत विक्रांतचं सत्य येणार समोर

'नवरी मिळे हिटलरला' मालिकेत लीलाची पहिली मंगळागौर साजरी होणार आहे. जहागीरदार घरातल्या सूना आणि नातंसुनांनी त्याची जोरात तयारी केली आहे. सगळ्याजणी नऊवारी नेसून आणि दागिने घालून छान तयार झाल्या आहेत.

पण या मंगळागौरीत फक्त खेळ नाही तर रेवतीच्या आयुष्याशी खेळणाऱ्या विक्रांतचंही सत्य सर्वांसमोर येणार आहे. लीलाच्या मंगळागौरीत लीलासमोर विक्रांतचं सगळं सत्य समोर येतं आणि हे पूजाला म्हणजेच विक्रांतच्या बायकोलादेखील कळतं.

ती लीलाची माफी मागते. पण पूजा लीलाकडून विक्रांतसोबत बोलायला थोडा वेळ मागून घेते. इकडे मंगळागौरीत लीला आणि तीन सुनांचं जंगी भांडण होतं. त्यामुळे सरोजिनी आई हा कलह थांबवण्यासाठी लीला आणि एजेला देवदर्शनाला पाठवते.

देवदर्शनाला जात असताना किशोर लीलावर हल्ला करतो. लीलाचा जीव धोक्यात असल्याने एजेचा जीव कासावीस होतो. एजे-लीला घरी आल्यानंतर पूजा आणि विक्रांत सगळं सांगण्यासाठी लीलाला बाहेर बोलवतात.

पण एजे विक्रांतला सगळ्यांसमोर दोषी ठरवतो आणि त्याला पोलिसांच्या ताब्यात देतो. लीलाची खात्री झाली आहे की एजे निर्दोष आहे आणि तिचं चुकलं आहे. अपमानाने खवळलेला विक्रांत हा पूजा आणि लीलाला मारायचं ठरवतो.

लीलाचा जीव पुन्हा धोक्यात असताना यावेळीही एजे ऐनवेळी पोहोचून लीलाचा जीव वाचवू शकेल का? लीलाची पहिली मंगळागौर कशी साजरी होईल? हे प्रेक्षकांना मालिकेच्या आगामी भागात पहायला मिळेल.