Nagar News – आढळा धरण ओव्हर फ्लो, शेतकर्‍यांनी पेढे वाटून केला आनंद व्यक्त

तालुक्यातील आढळा खोर्‍यातील देवठाण येथील 1 हजार 60 दशलक्ष घनफूट क्षमतेचे आढळा धरण शंभर टक्के भरले. शुक्रवारी सकाळी 6 वाजेपर्यंत या धरणाचा पाणीसाठा 1044 दशलक्ष घनफूट झाला. धरणाच्या पाणलोट क्षेत्रात मुसळधार पाऊस सुरू असल्यामुळे धरण पूर्ण भरले आणि सांडव्यावरून ओव्हर फ्लो झाले. आढळा धरण पूर्ण क्षमतेने भरल्यानंतर अकोले व संगमनेर तालुक्यातील धरणाच्या लाभक्षेत्रातील शेतकऱ्यांसह नागरिकांनी आनंद व्यक्त केला.

पुढील काही दिवसांमध्ये पाणलोट क्षेत्रात पाऊस वाढण्याची चिन्हे आहेत. या धरणाच्या पाणलोट क्षेत्रात पाडोशी व सांगवी लघू पाटबंधारे तलाव आहेत. ही दोन्ही जलाशय पूर्ण भरल्यानंतर आढळा धरणाचा पाणीसाठ्यात वाढ झाली. या धरणाच्या लाभक्षेत्रात 3914 हेक्टर क्षेत्र सिंचनाखाली येते. त्यात अकोले तालुक्यातील 7, संगमनेर तालुक्यातील 8 व सिन्नर (जि.नाशिक) तालुक्यातील एक अशा एकूण 16 गावांचे 3 हजार 914 हेक्टर सिंचनक्षेत्र आहे. सांडव्यावरून नदीच्या पात्रात पाणी वाहू लागताच देवठाण, हिवरगाव, वीरगाव, गणोरे, पिंपळगाव निपाणी, डोंगरगाव येथील शेतकऱ्यांनी पेढे वाटून आनंद व्यक्त केला.

Tags:

About The Author

Manisha Thorat- Pisal

सौ. मनिषा-थोरात-पिसाळ गेल्या १२ वर्षांपासून पत्रकारिता क्षेत्रात कार्यरत आहेत. ‘‘न्यूज एक्सप्रसे मराठी’’ या पुणे जिल्ह्यातील आघाडीच्या न्यूज पोर्टलच्या कार्यकारी संपादक म्हणून जबाबदारी सांभाळत आहेत. सामाजिक, राजकीय, शैक्षणिक आणि औद्योगिक क्षेत्रातील विविध समाजपयोगी उपक्रमांमध्ये त्यांनी योगदान दिले आहे.