बालमैत्रिणीच्या नोकरीची पार्टी करायला आला; पण दारुच्या नशेत भलतंच करुन बसला!

नवीन नोकरी लागल्यानिमित्त पार्टीसाठी बोलावणाऱ्या बालमैत्रिणीवरच मित्राने बलात्कार केल्याची घटना समोर आली आहे. हैदराबाद शहरात वनस्थलीपुरम परिसरात एका बार अँड रेस्टॉरंटमध्ये ही घटना घडली. याप्रकरणी पोलिसांनी पीडितेचा मित्र आणि त्याच्या भावाविरोधात गुन्हा दाखल केला आहे. घटनेनंतर आरोपी फरार झाले असून पोलीस त्यांचा शोध घेत आहेत.

पीडित तरुणी सॉफ्टवेअर इंजिनिअर असून तिला नुकतीच नवीन नोकरी लागली होती. नवी नोकरी लागल्याचा आनंद साजरा करण्यासाठी सोमवारी संध्याकाळी तिने आपल्या बालमित्राला बोलावले. दोघंही हैदराबाद शहरातील वनस्थलीपुरम येथे एका बार अँड रेस्टॉरंटमध्ये भेटले.

रेस्टॉरंटमध्ये दोघांनी पार्टीदरम्यान मद्यप्राशन केले. त्यानंतर दोघे रेस्टॉरंटमधील रुममध्ये गेले. तेथे दारुच्या नशेत मित्राने पीडितेवर बलात्कार केला. त्यानंतर काही वेळाने त्याचा चुलत भाऊ खोलीत आला आणि त्यानेही पीडितेवर बलात्कार केला. त्यानंतर दोघेही भाऊ तिथून पसार झाले.

पीडितेने आपल्या भावाला फोन करुन सर्व आपबीती सांगितली. त्यानंतर तरुणीच्या फिर्यादीवरुन पोलिसांनी दोघा आरोपींविरोधात गुन्हा दाखल केला आहे. तसेच पीडितेला वैद्यकीय तपासणीसाठी रुग्णालयात नेण्यात आले.