केसांना खूप जपणाऱ्या हिना खानला अखेर करावं लागलं टक्कल; नेटकरी म्हणाले ‘खूप हिंमत..’

‘ये रिश्ता क्या कहलाता है’ या मालिकेतून घराघरात पोहोचलेली अभिनेत्री हिना खान स्तनाच्या कर्करोगाशी झुंज देत आहे. कर्करोग निदान झाल्यापासून त्यावर विविध उपचार घेण्यापर्यंतची प्रत्येक अपडेट ती सोशल मीडियाद्वारे चाहत्यांसोबत शेअर करतेय. त्याचप्रमाणे या कठीण परिस्थितीला ती कशी सामोरं जातेय, हे दाखवत इतरांनाही प्रेरणा देतेय. हिनाला तिसऱ्या स्टेजच्या ब्रेस्ट कॅन्सरचं निदान झालं आहे. मुंबईतील कोकिलाबेन रुग्णालयात तिच्यावर उपचार सुरू आहेत. आरोग्याशी संबंधित अनेक आव्हानं झेलत ती खंबीरपणे उपचारांना सामोरी जातेय. ज्या परिस्थितीत अनेकजण खचून जातात किंवा आशा गमावून बसतात, अशा स्थितीत हिना अत्यंत सकारात्मकपणे सर्व काही सहन करताना दिसतेय. कॅन्सरवरील उपचार सुरू असताना हिनाने तिचे केस कापले होते. आता किमोथेरेपी सुरू असताना तिने पूर्णपणे टक्कल केलंय.

हिनाने नुकताच तिच्या इन्स्टाग्राम अकाऊंटवर एक व्हिडीओ पोस्ट केला आहे. यामध्ये तिच्या डोक्यावर टोपी दिसत आहे. तिने तिच्या डोक्यावरील सर्व केस कापले असून टक्कल केलं आहे. अशा स्थितीतही ती चेहऱ्यावर हास्य ठेवून एका स्किनकेअर ब्रँडचं प्रमोशन करताना दिसतेय. हिनाच्या या व्हिडीओवर टीव्ही इंडस्ट्रीतील विविध सेलिब्रिटी आणि चाहत्यांकडून लाइक्स, कमेंट्सचा वर्षाव होतोय. अभिनेता नकुल मेहताने तिला ‘चॅम्पियन’ असं म्हटलंय. तर दुसऱ्या युजरने ‘सिंहीण’ असं लिहिलं आहे.

 

View this post on Instagram

 

A post shared by 𝑯𝒊𝒏𝒂 𝑲𝒉𝒂𝒏 (@realhinakhan)

हिना सध्या कर्करोगावरील उपचार घेत आहे. सर्जरीनंतर तिच्यावर किमोथेरेपी सुरू आहे. पहिल्या किमोनंतर हिनाच्या शरीरावर काही डागसुद्धा दिसून आले. याविषयी नेटकऱ्यांनी काळजी व्यक्त केली. मात्र सकारात्मक विचार डोक्यात ठेवून या सर्व गोष्टींना सामोरं जात असल्याचं हिनाने चाहत्यांना सांगितलं आहे. किमोथेरेपी सुरू करण्यापूर्वी हिनाने तिचे केससुद्धा कापले. किमोथेरेपीमुळे केस गळतात. त्यामुळे आधीच हिंमत दाखवत हिनाने तिचे केस छोटे केले. त्याचा व्हिडीओसुद्धा तिने सोशल मीडियावर पोस्ट केला होता. हिनाला पाहून तिची आई भावूक झाल्याचं या व्हिडीओमध्ये दिसलं होतं.