Yavatmal News: यवतमाळ पोलीस अधीक्षक अ‍ॅक्शन मोडवर, सराईत गुन्हेगारांविरुद्ध कारवाईचा धडाका

यवतमाळच्या पोलीस अधीक्षकांनी सराईत गुन्हेगारांविरोधात कारवाईचा दंडुका उगारला आहे. मागील दीड वर्षांपासून कारवाईचा धडाका लावण्यात आला असून, सहा गुन्हेगारी टोळ्यांवर मोक्का कायद्याचा बडगा उगारण्यात आला. संघटीत गुन्हेगारीच्या या कायद्याअंतर्गत 45 गुंडांना गजाआड केले आहे. तसेच एमपीडीए कायद्यांतर्गत 39 गुन्हेगारांना स्थानबद्ध केले आहे. आतापर्यंत 137 जणांच्या तडीपारीचा प्रस्ताव दिला आहे तर 47 जणांना तडीपार केले आहे.

जिल्ह्यात गुन्हेगारीचे प्रमाण दिवसेंदिवस वाढत आहे. गुन्हेगारांना कायद्याचा धाकच राहिला नसल्याचे चित्र आहे. भररस्त्यात हत्या करण्याइतपत गुन्हेगारांची मजल गेली आहे. टोळीयुद्धही मोठ्या प्रमाणावर वाढले आहे. आपले वर्चस्व प्रस्थापित करण्यासाठी टोळ्यांद्वारे रक्तपात घडवला जात आहे. अल्पवयीन मुलेही गुन्हेगारीकडे वळली आहेत. अल्पवयीन मुलांना मिळणाऱ्या कायद्याच्या संरक्षणाचा गैरफायदा घेतला जात आहे. संघटित गुन्हेगारीच्या नव्या मोडस ऑपरेंडीचा बिमोड करण्यासाठी पोलिसांनी कठोर पावले उचलली आहेत.

धडक कारवाई मोहिमेबाबत पोलीस अधीक्षक डॉ. पवन बनसोड यांनी सांगितले की, संघटित गुन्हेगारांच्या मुसक्या आवळण्यासाठी आम्ही एमपीडीए, मोक्का यासारख्या कठोर कायद्यांचा दणका देत आहोत. कायदा सुव्यवस्था अबाधित ठेवण्यासाठी तडीपारीसारख्या प्रतिबंधात्मक कारवाई करत आहोत. जिल्ह्यात गांजा विक्री व सेवन करणारे नशेबाजही आमच्या रडारवर आहेत. लोकसभा निवडणुकीप्रमाणेच विधानसभा निवडणूक शांततेत पार पाडण्यासाठी विशेष प्रयत्न सुरु आहेत, असे डॉ. बनसोड यांनी स्पष्ट केले.

Tags:

About The Author

Manisha Thorat- Pisal

सौ. मनिषा-थोरात-पिसाळ गेल्या १२ वर्षांपासून पत्रकारिता क्षेत्रात कार्यरत आहेत. ‘‘न्यूज एक्सप्रसे मराठी’’ या पुणे जिल्ह्यातील आघाडीच्या न्यूज पोर्टलच्या कार्यकारी संपादक म्हणून जबाबदारी सांभाळत आहेत. सामाजिक, राजकीय, शैक्षणिक आणि औद्योगिक क्षेत्रातील विविध समाजपयोगी उपक्रमांमध्ये त्यांनी योगदान दिले आहे.