गुजरात जीएसटी आयुक्तांकडून साताऱ्यातील गावाची खरेदी, राष्ट्रीय हरित लवादाने पाच जणांना बजावली नोटीस

गुजरातचे जीएसटी आयुक्त चंद्रकांत वळवी यांनी महाबळेश्वरजवळील 620 एकर जमिनीवर विस्तारलेले अख्खे गाव खरेदी केल्याच्या प्रकाराची राष्ट्रीय हरित लवादाने दखल घेतली आहे. लवादाने महाराष्ट्र प्रदूषण नियंत्रण मंडळ, केंद्रीय प्रदूषण नियंत्रण मंडळ, पर्यावरण व वन मंत्रालयाचे प्रादेशिक कार्यालय, मुख्य वनसंरक्षक व सातारा जिल्हाधिकाऱयांना नोटीस बजावली आहे. चंद्रकांत वळवी व नातेवाईकांनी कांदाटी खोऱयातील झाडानी गाव विकत घेतल्याचा आरोप आहे. ही जमीन सरकारद्वारे अधिग्रहित केली जात असून संपादन प्रक्रियेच्या वैधतेबाबत शंका उपस्थित केली जात आहे. यासंदर्भात प्रसिद्ध बातमीची हरित लवादाने गंभीर दखल घेतली. वळवी यांनी जमीन खरेदीनंतर परिसरात सुरू केलेली बेकायदेशीर बांधकामे, खोदकाम, झाडे तोडणे, रस्तेकाम, वनक्षेत्रातून होणारा पाणीपुरवठा यामुळे पर्यावरणाचे मोठे नुकसान झाल्याचे लवादाच्या निदर्शनास आले आहे. याप्रकरणी 6 सप्टेंबरला पुढील सुनावणी होणार आहे.

Tags:

About The Author

Manisha Thorat- Pisal

सौ. मनिषा-थोरात-पिसाळ गेल्या १२ वर्षांपासून पत्रकारिता क्षेत्रात कार्यरत आहेत. ‘‘न्यूज एक्सप्रसे मराठी’’ या पुणे जिल्ह्यातील आघाडीच्या न्यूज पोर्टलच्या कार्यकारी संपादक म्हणून जबाबदारी सांभाळत आहेत. सामाजिक, राजकीय, शैक्षणिक आणि औद्योगिक क्षेत्रातील विविध समाजपयोगी उपक्रमांमध्ये त्यांनी योगदान दिले आहे.