पुण्यातील तरुण अमेरिकेत बेपत्ता, पालकांचा मदतीसाठी टाहो!

अमेरिकेत नोकरीनिमित्त वास्तव्यास असलेला पुण्याचा तरुण तेथील खाडीत बुडाल्याची धक्कादायक घटना घडली आहे. सिद्धांत विठ्ठल पाटील असे बेपत्ता तरुणाचे नाव आहे. सिद्धांत सात मित्रांसोबत अमेरिकेतील मोंटाना राज्यातील ग्लेशियर नॅशनल पार्कमध्ये पिकनिकला गेला होता. 6 जुलै रोजी मित्रांसोबत हायकिंग गेलेला सिद्धांत खाडीत तोल जाऊन पडला आणि बुडाला. बेपत्ता सिद्धांतला शोधण्यासाठी मोहीम सुरू असल्याची माहिती ग्लेशियर नॅशनल पार्कच्या प्रवक्त्यांनी दिली.

हायकिंगला जाण्याआधी शनिवारी सकाळी सिद्धांतने आईला मॅसेज करून आपण मित्रांसोबत पिकनिक जाणार असल्याचे सांगितले. आईला मॅसेज केल्यानंतर मोबाईल रुममध्ये ठेवून सिद्धांत मित्रांसोबत खाडीत हायकिंग करायला गेला. यावेळी खडकावर उभा असताना तोल जाऊन तो पाण्यात पडला. त्यानंतर एकदा त्याचे डोकेवर दिसले आणि मग तो दिसेनासा झाला. त्याचा तोल गेला की आणखी काही घडले? हे अद्याप स्पष्ट झालेले नाही.

खाडी आणि आजूबाजूच्या परिसरात हेलिकॉप्टरद्वारे सिद्धांतचा शोध घेण्यात आला. तसेच 10 हून अधिक रेंजर्सनेही खाडीच्या बाजूने त्याचा शोध घेण्याचा प्रयत्न केला.

सिद्धांत हा आई-वडिलांचा एकुलता एक मुलगा आहे. मुलगा बेपत्ता झाल्याने आई-वडील चिंतेत आहेत. तर अधिकाऱ्यांकडून पुरेसे प्रयत्न केले जात नाहीत, असा आरोप सिद्धांतचे मामा प्रितेश चौधरी यांनी केला आहे. दरम्यान, परराष्ट्रमंत्री ए. जयशंकर यांना पत्र लिहून याप्रकरणात लक्ष घालण्याची विनंती महाराष्ट्र सरकारने केली आहे.