ठरलं तर…कोण कितव्या मजल्यावर राहणार; वरळी बीडीडी चाळ पुनर्विकास प्रकल्प

म्हाडाकडून 842 चाळकऱ्यांच्या सदनिकांची निश्चिती
म्हाडातर्फे वरळी बीडीडी चाळ पुनर्विकास प्रकल्पाअंतर्गत उभारण्यात येणाऱया पुनर्वसन इमारतींमध्ये पात्र चाळकऱयांना वितरित करावयाच्या 842 पुनर्वसन सदनिकांची नुकतीच निश्चिती करण्यात आली. इमारत क्रमांक 1 मधील बी, एफ आणि एच विंगमध्ये या चाळकऱयांची सदनिका निश्चिती करण्यात आली असून डिसेंबर 2025 पर्यंत सदनिकांचा ताबा देण्याचा आमचा प्रयत्न राहील, असे म्हाडाच्या एका वरिष्ठ अधिकाऱयाने सांगितले.

बीडीडी चाळ पुनर्विकास प्रकल्प हा देशातील सर्वात मोठा नागरी पुनरुत्थान प्रकल्प असून या प्रकल्पाचे काम महाविकास आघाडीच्या काळात सुरु झाले. म्हाडाच्या माध्यमातून वरळीच्या बीडीडी चाळीच्या पुनर्विकासाचे काम सध्या जोरात सुरू आहे. मे. टीसीसी कन्स्ट्रक्शन पंपनीमार्फत वरळीतील 121 चाळींचा पुनर्विकास करून 9689 सदनिका उभारण्यात येणार आहे. याअंतर्गत आता वरळी बीडीडीतील 18, 19, 20, 59, 60, 61, 78, 79, 80, 81 आणि 82 या अकरा चाळींमध्ये वास्तव्यास असलेल्या 842 पात्र चाळकऱयांची म्हाडातर्फे सदनिका निश्चिती करण्यात आली आहे.

नव्या इमारतीचा श्रीगणेशा
सदनिकांची निश्चिती झाल्यानंतर आता या चाळकऱयांसोबत करार केला जाईल. त्यानंतर चाळकऱयांना भाडय़ाचा किंवा संक्रमण शिबिराचा पर्याय देऊन अकरा चाळी रिक्त केल्या जातील. 18, 19, 20 या चाळींच्या जागेवर कमर्शियल तर इतर आठ चाळींच्या जागेवर पुनर्वसन इमारतीच्या बांधकामाला सुरुवात होईल, अशी माहिती म्हाडाच्या वरिष्ठ अधिकाऱयाने दिली.