Nashik: भरधाव कारच्या धडकेत महिला ठार, मद्यपी चालकाला अटक

गंगापूर रस्त्यावर बारदान फाटा येथे मंगळवारी सायंकाळी भरधाव कारच्या धडकेत महिला ठार झाली. मद्यपी कारचालकाला गंगापूर पोलिसांनी अटक केली आहे.

बारदान फाटा येथील मिसळच्या हॉटेलमधील काम आटोपून अर्चना किशोर शिंदे (31) या शिवाजीनगर येथे घराकडे जात होत्या. पाठीमागून भरधाव वेगात आलेल्या मारुती अल्टो कारने त्यांना जोरदार धडक दिली. अपघातानंतर न थांबताच कारचालक फरार झाला. सीसीटीव्हीत ही घटना चित्रीत झाली. रस्त्याने जाणार्‍या नागरिकांनी शिंदे यांना खासगी रुग्णालयात दाखल केले असता डॉक्टरांनी त्यांना मृत घोषित केले. नागरिकांनी दिलेल्या कारच्या नंबरवरून पोलिसांनी कार चालकाचा पत्ता शोधला. देवचंद रामु तिदमे याला ध्रुवनगर येथील राहत्या घरातून ताब्यात घेतले. मद्याच्या नशेत त्याने सुसाट कार चालवून हा अपघात केल्याचे स्पष्ट झाले. पोलिसांनी गुन्हा दाखल करून त्याला अटक केली आहे.

Tags:

About The Author

Manisha Thorat- Pisal

सौ. मनिषा-थोरात-पिसाळ गेल्या १२ वर्षांपासून पत्रकारिता क्षेत्रात कार्यरत आहेत. ‘‘न्यूज एक्सप्रसे मराठी’’ या पुणे जिल्ह्यातील आघाडीच्या न्यूज पोर्टलच्या कार्यकारी संपादक म्हणून जबाबदारी सांभाळत आहेत. सामाजिक, राजकीय, शैक्षणिक आणि औद्योगिक क्षेत्रातील विविध समाजपयोगी उपक्रमांमध्ये त्यांनी योगदान दिले आहे.