दुधाला 30 रुपये दर, पाच रुपयांचे अनुदान; दूध पावडरलाही मिळणार अनुदान

राज्यातील दूध उत्पादक शेतकऱयांना प्रतिलिटर 30 रुपये आणि पाच रुपयांचे अनुदान देण्याच्या महत्त्वपूर्ण निर्णयाला मंत्रिमंडळाच्या बैठकीत मान्यता मिळाली असल्याची माहिती पशुसंवर्धन व दुग्ध व्यवसाय विकास मंत्र्यांनी दिली. 1 जुलैपासून हे दर लागू होणार असून दूध पावडरसाठी प्रतिकिलो 30 रुपये अनुदान देण्यावरही आजच्या बैठकीत शिक्कामोर्तब करण्यात आले.

पशुसंवर्धन व दुग्ध व्यवसाय मंत्री राधाकृष्ण विखे-पाटील यांनी दूध उत्पादक शेतकऱयांना दिलासा मिळावा यासाठी राज्यभरातील सहकारी तथा खासगी दूध उत्पादक संघ आणि दूध उत्पादक शेतकरी यांची तातडीची बैठक मंत्रालयात बोलावली होती. या बैठकीत मंत्री पाटील यांनी दूध उत्पादक शेतकरी व दूध संघाच्या समस्या जाणून घेतल्या आणि त्यांच्या मागण्या विचारात घेता राज्यातील सर्व खासगी तथा सहकारी दूध संघाने शेतकऱयांना प्रतिलिटर 30 रुपये भाव देण्याचे सर्वानुमते निश्चित केल्याचे सभागृहाला सांगितले. त्यानंतर सरकार शेतकऱयाला

5 रुपये प्रतिलिटर अनुदान दूध उत्पादक शेतकऱयांच्या खात्यात वर्ग करेल. जेणेकरून शेतकऱयाला प्रतिलिटर 35 रुपये मिळतील. यामुळे शेतकऱयांना मोठा दिलासा मिळणार आहे, असे ते म्हणाले. आज झालेल्या मंत्रिमंडळाच्या बैठकीत सर्वानुमते या निर्णयाला संमती दर्शवली. लवकरच याबाबतचा शासन निर्णय जाहीर केला जाईल, असे मंत्री विखे-पाटील म्हणाले.