रुढी-परंपरेला छेद देत दिराचा विधवा भावजयीशी विवाह, शेवगाव येथील विवाहाची चर्चा

पतीच्या निधनानंतर महिलांना विधवा म्हणून उर्वरित आयुष्य जगताना अनेकदा कुटुंब आणि समाजव्यवस्थेकडून मर्यादा येतात. अनेक अडचणींचा सामना करावा लागतो. शेवगाव येथील सौरभ शिंदे या अविवाहित तरुणाने रूढी-परंपरांना छेद देत विधवा भावजयीशी विवाह करून समाजासमोर आदर्श ठेवला आहे. मोठा भाऊ गौरव यांच्या मृत्यूनंतर सौरभने बाळासह विधवा भावजयीचा पत्नी म्हणून स्वीकार केला.

शेवगाव येथील गौरव शिंदे यांचा विवाह काही वर्षांपूर्वी गंगा खुळे हिच्याशी झाला. दोघांचा सुखाचा संसार सुरू होता. त्यांना दोन गोंडस मुलेही झाली. मात्र, त्यांच्या या सुखी संसाराला दृष्ट लागली आणि गौरव यांचे निधन झाले. गौरवच्या मृत्यूनंतर शिंदे व खुळे कुटुंबीयांनी एकत्र बसून तरुणपणीच विधवा झालेल्या गंगाच्या उर्वरित आयुष्याचा विचार करून मयत गौरवचा लहान भाऊ सौरभ याच्याशी तिचे लग्न लावून देण्याचा प्रस्ताव मांडला. त्यानेही आपण गंगासह तिच्या दोन्ही बाळांचा स्वीकार करण्यास तयार असल्याचे सांगत मनाचा मोठेपणा दाखविला. त्यानंतर हा विवाह सोहळा शेवगाव येथे दोन्ही कुटुंबीयांच्या व मित्रमंडळींच्या उपस्थितीत 30 जून रोजी पार पडला.

यावेळी माजी नगरसेवक सागर फडके, सीताराम लांडे, वसंत देवधर, बाळासाहेब काकडे, शरद मडके यांच्यासह नातेवाईक व मित्रमंडळी उपस्थित होते.