Ratnagiri crime news : रेल्वे चोरीतील 18 तोळे सोन्यापैकी 13 तोळे सोने हस्तगत करण्यात शहर पोलिसांना यश

रेल्वेतून प्रवास करताना चोरट्याने बॅग आणि 18 तोळे सोने लंपास केले होते. त्या चोरट्याला रत्नागिरी शहर पोलिसांनी मडगाव येथे अटक केली. त्याच्याकडून 18 तोळे सोन्यापैकी 13 तोळे सोने पोलिसांनी जप्त केले आहे. ही कारवाई शहर पोलिसांतील गुन्हे प्रकटीकरण कक्षाच्या पोलिसांनी केली.

अन्नमा जोसफ (वय – 56, रा. केरळ, सध्या रा. डोंबिवली) हे केरळ ते मुंबई प्रवास करत होते. त्यांना कोकण रेल्वे मार्गावरिल आडवली ते रत्नागिरी दरम्यान झोप लागली. त्याचा फायदा घेऊन चोरट्याने त्यांची बॅग व 18 तोळ्याचे सोन्याचे दागिने चोरुन नेले होते. जोसेफ यांच्या ही बाब लक्षात आल्यानंतर त्यांनी शहर पोलिस ठाण्यात तक्रार दिली. त्यानंतर एक महिन्यानंतर पोलिसांनी चोरट्याला पकडले. प्रसाद जगन्नाथ पाटील (वय – 30, रा. भेरसे, अलिबाग, रायगड) असे चोरट्याचे नाव आहे.

आरोपीचा शोध घेण्यासाठी पोलिसांनी सीसीटीव्ही फुटेजचा वापर केला. तो कुठे कसा गेला याचा ट्रेस सुरु असताना एका एटीएममध्ये पैसे काढत असताना त्याचा पूर्ण चेहरा समोर आला. त्यानंतर शहर पोलिसांनी शुक्रवारी 28 जून रोजी पहाटे मडगाव येथून त्याला अटक केली होती. प्रसादला अटक केलानंतर त्याने चोरलेले सोने कुठे नेले याचा तपास करताना ते सोने अलिबाग येथील अरुण जनबा घोटणे याला विकल्याची माहिती पुढे आली . त्यानंतर पोलिसांनी अरुण घोटणे यालाही ताब्यात घेऊन त्याच्याकडून 18 तोळे पैकी 13 तोळे सोने जप्त करण्यात यश मिळवले.

अनेकदा रेल्वेमधील चोऱ्या उघडकीस येत नाहीत. चोरी एकीकडे होते तर त्याची तक्रार दुसर्या गावातील पोलीस स्थानकात होते. रेल्वे प्रवास दरम्यान चोरट्याचा माग काढणे सोपे नसते. मात्र रत्नागिरी शहर पोलीस स्थानकातील गुन्हे प्रकटीकरण कक्षाच्या पोलिसांनी कमाल करत हो चोरी उघडकीस आणलीच परंतु दोन मुख्य संशयिताना जेरबंद करतानाच मुद्देमाल सुद्धा जप्त केला.

ही कामगिरी शहर पोलीस निरीक्षक महेश तोरसकर यांच्या मार्गदर्शनाखाली गुन्हे प्रकटीकरण कक्षातील पोलीस उपनिरीक्षक श्याम आरमळकर, सहायक पोलीस उपनिरीक्षक दिपक साळवी, पोलीस हवालदार अरुण चाळके, राहुल जाधव, अमोल भोसले, पोलीस नाईक पंकज पडेलकर, आशिष भालेकर, भालचंद्र मयेकर पोलीस शिपाई अमित पालवे यांनी केली. अधिक तपास पोलीस उपनिरीक्षक श्याम आरमळकर करीत आहेत.