माणूस माणुसकी विसरला पण प्राणी नाही! वसईत भटक्या कुत्र्याने ‘अशी’ वाचवली महिलेची अब्रू

हल्ली कुठेही कुणावर अन्याय होत असेल तर माणसं मदतीला जाण्याऐवजी मोबाईलमध्ये व्हिडिओ बनवण्यात व्यस्त असतात. एखाद्या महिलेवरही अत्याचार होत असेल तरीही कुणी माणुसकी दाखवत नाही. पण माणसाला लाजवेल असे कृत्य एका भटक्या कुत्र्याने करून दाखवले आहे. एका भटक्या कुत्र्यामुळे 32 वर्षीय महिलेची नराधमाच्या तावडीतून सुटका झाली आहे. वसईतील तुंगारेश्वर परिसरात ही घटना घडली आहे.

पेशाने अकाऊंटंट असलेली ही महिला पहाटेच्या सुमारास तुंगारेश्वर परिसरातून चालली होती. यावेळी एका 35 वर्षाच्या तरुणाने तिचा पाठलाग सुरू केला. अखेर तुरंगारेश्वर गल्लीत अंधारात त्याने तिला गाठलेच. यानंतर त्याने महिलेला बलात्कार करण्याची धमकी देत खाली जमिनीवर ढकलले आणि तिला घाणेरडे स्पर्श करू लागला.

इतक्यात एक भटका कुत्रा तेथे आला आणि आरोपीच्या अंगावर जोरजोरात भुंकू लागला. कुत्र्याच्या भुंकण्यामुळे आरोपीची पकड सैल झाली. याचा फायदा घेत महिलेने आरोपीला जोरदार धक्का बाजूला ढकलले आणि मेन रोडच्या दिशेने पळाली. भटक्या कुत्र्यामुळे महिलेची अब्रू वाचली. मात्र आरोपी महिलेचा आयफोन हिसकावण्यात यशस्वी झाला.

महिलेने तात्काळ माणिकपूर पोलीस ठाणे गाठत घडला प्रकार पोलिसांना सांगितला. यानंतर पोलिसांनी महिलेची तक्रार नोंदवत आरोपीचा शोध सुरू केला. आरोपीचा कसून शोध घेत 24 तासात पोलिसांनी नालासोपारा येथून त्याच्या मुसक्या आवळल्या. संदीप खोत असे आरोपीचे नाव असून, त्याच्यावर विविध पोलीस ठाण्यात गुन्हे दाखल आहेत. ‘मिड डे’ने याबाबत वृत्त दिले आहे.