गुजरातमध्ये भाजपचा काँग्रेस कार्यालयावर हल्ला, तुफान दगडफेक, वाहनांची तोडफोड

काँग्रेस नेते, लोकसभेतील विरोधी पक्षनेते राहुल गांधी यांनी संसदेत कमळाबाईच्या नकली हिंदुत्वाची सालटी काढल्यानंतर आता भाजप कार्यकर्त्यांनी रस्त्यावर गोंधळ घालायला सुरुवात केली आहे. गुजरातमध्ये काँग्रेसच्या प्रदेश कार्यालयावर भाजपच्या कार्यकर्त्यांनी हल्ला केला. दगडफेक करीत वाहनांची तोडपह्ड केली. दरम्यान, भाजपच्या या गुंडगिरीवर राहुल गांधींनी थेट भाष्य केले आहे. भ्याड आणि हिंसक हल्ला करून भाजप आणि संघ परिवाराने माझे वक्तव्य खरे ठरवले, असे ते म्हणाले.

राष्ट्रपतींच्या अभिभाषणावरील चर्चे वेळी लोकसभेत बोलताना सोमवारी राहुल गांधी यांनी भाजप, राष्ट्रीय स्वयंसेवक संघ आणि पंतप्रधान नरेंद्र मोदी यांच्या नकली हिंदुत्वाची जोरदार चिरफाड केली. ‘‘भाजप, संघ आणि मोदी म्हणजे हिंदुत्व नाही. भाजप, संघ म्हणजे संपूर्ण हिंदू समाज नाही. हिंदुत्व हा काही भाजपचा ठेका नाही,’’ असे राहुल गांधींनी फटकारले होते. राहुल गांधींच्या वक्तव्यानंतर भाजपने देशभरात काँग्रेस कार्यालयांना लक्ष्य करण्याचा प्रयत्न केला. पंतप्रधान मोदी, गृह मंत्री शहांच्या गुजरातमध्ये भाजपने हिंसक आंदोलन केले. भाजप कार्यकर्त्यांनी मंगळवारी अहमदाबादेत काँग्रेस कार्यालयावर हल्ला केला. तुफान दगडफेक करीत वाहनांची तोडपह्ड केली. काँग्रेस कार्यकत्यांनी याला विरोध केला. दगडफेकीत पोलीसही जखमी झाले. पोलिसांनी दोन्ही बाजूच्या कार्यकर्त्यांना अटक केली आहे. दरम्यान, गांधीनगर, राजकोटसह गुजरातच्या इतर शहरांमध्येही काँग्रेस कार्यालयांसमोर भाजपने आंदोलन केले.

भाजपनं माझं मत खरं ठरवलं!

काँग्रेस कार्यालयावरील हल्ल्यानंतर राहुल गांधी यांनी ‘एक्स’द्वारे भाजपला फटकारले. गुजरात काँग्रेसच्या कार्यालयावर झालेल्या भ्याड आणि हिंसक हल्ल्याने भाजप व संघ परिवाराने माझं मत खरं ठरवलं आहे. हिंसाचार आणि द्वेष पसरवणाऱया भाजपच्या लोकांना हिंदू धर्माची मूलभूत तत्त्वेच कळत नाहीत. गुजरातची जनता त्यांचा खोटेपणा स्पष्टपणे पाहू शकते आणि भाजप सरकारला जनता निर्णायक धडा शिकवेल. मी पुन्हा सांगतोय, गुजरातमध्ये इंडिया आघाडी जिंकणार आहे, असे राहुल म्हणाले.