प्रसिद्ध गायिका मोनाली ठाकूरसोबत लाइव्ह कॉन्सर्टदरम्यान गैरवर्तणूक झाली. यामुळे संतप्त मोनालीने कॉन्सर्टमध्ये गाणं थांबवत संबंधित व्यक्तीला सुनावलं. भर कॉन्सर्टमध्ये गर्दीतून एका श्रोत्याने मोनालीच्या प्रायव्हेट पार्टवर कमेंट केली. ते ऐकून तिच्या तळपायाची आग मस्तकात पोहोचली आणि तिने मध्येच गाणं थांबवलं. शनिवारी 29 जून रोजी भोपाळच्या सेज युनिव्हर्सिटीमध्ये मोनालीच्या कॉन्सर्टचं आयोजन करण्यात आलं होतं. तिच्या कॉन्सर्टला तरुणांची फार गर्दी होती. स्टेजवर परफॉर्म करताना मोनाली अचानक थांबली आणि ती तिच्या टीमसोबत काही बोलू लागली. यानंतर तिने संताप व्यक्त केला.
मोनालीने गर्दीत उभ्या असलेल्या एका व्यक्तीकडे इशारा करत सांगितलं की त्याने तिच्या प्रायव्हेट पार्टवर कमेंट केली. या घटनेला मोनालीने लैंगिक शोषण म्हणत संबंधित व्यक्तीवर तीव्र संताप व्यक्त केला. “काही लोक लपून कमेंट करत आहेत. ही सेक्शुअल हरॅसमेंट (लैंगिक शोषण) आहे. मी या मुद्द्यावर सर्वांसमोर बोलतेय, जेणेकरून कमेंट करणाऱ्या लोकांना हे लक्षात राहील. अशा पद्धतीने सार्वजनिक ठिकाणी कमेंट करणं योग्य नाही. तुम्ही खूप तरूण आहात, तुम्ही कोणाशीच असं वागू नये. हे फक्त माझ्यासाठीच नाही, तर इतर कोणासाठीही ठीक नाही. गर्दीचा फायदा घेत लोक कमेंट करून निघून जातात. मला संधी मिळाली म्हणून मी याबद्दल सर्वांसमोर बोलतेय”, असं ती म्हणाली.
मोनालीच्या टीमकडूनही संबंधित व्यक्तीला समज देण्यात आला. त्यानंतर मोनालीने पुन्हा परफॉर्म करण्यास सुरुवात केली. नंतर कमेंट करणाऱ्या व्यक्तीने आपली बाजू मांडत म्हटलं, “मी फक्त मोनालीच्या डान्स मूव्हवर कमेंट केली होती. त्यात काहीच आक्षेपार्ह म्हटलं नव्हतं.” या घटनेचा व्हिडीओ सध्या सोशल मीडियावर व्हायरल होत आहे. अनेक कार्यक्रमांमध्ये सेलिब्रिटींबद्दल अशा पद्धतीने आक्षेपार्ह कमेंट्स केले जातात. मात्र हे अत्यंत चुकीचं असल्याचं नेटकऱ्यांनी म्हटलंय.
मोनाली ठाकूर ही राष्ट्रीय पुरस्कार विजेती गायिका आहे. तिने बॉलिवूडमधील अनेक हिट गाणी गायली आहेत. यामध्ये ‘मोह मोह के धागे’, ‘सवार लूँ’, ‘जरा जरा टच मी’ यांचा समावेश आहे. मोनाली काही गाण्यांच्या शोजमध्ये परीक्षकेच्या भूमिकेत होती.
सौ. मनिषा-थोरात-पिसाळ गेल्या १२ वर्षांपासून पत्रकारिता क्षेत्रात कार्यरत आहेत. ‘‘न्यूज एक्सप्रसे मराठी’’ या पुणे जिल्ह्यातील आघाडीच्या न्यूज पोर्टलच्या कार्यकारी संपादक म्हणून जबाबदारी सांभाळत आहेत. सामाजिक, राजकीय, शैक्षणिक आणि औद्योगिक क्षेत्रातील विविध समाजपयोगी उपक्रमांमध्ये त्यांनी योगदान दिले आहे.
.jpeg)
Comment List