पंजाबवरून नांदेडला जात असताना इनोव्हा कारची ट्रकला जोरदार धडक, चौघांचा जागीच मृत्यू

पंजाबवरून नांदेडला जात असताना एका इनोव्हा कारची ट्रकला धडक झाली. या अपघातात 4 भाविकांचा जागीच मृत्यू झाल्याची दुर्दैवी घटना यवतमाळ जिल्ह्यातील कळंब येथे घडली आहे .यात एक जण गंभीर जखमी झाला असून त्याच्यावर यवतमाळ शासकीय रुग्णालयात उपचार सुरू आहेत. त्याचीही प्रकृती चिंताजनक असल्याचे समजते .

पंजाबमधून नांदेड येथे काही भाविक गुरुद्वारा दर्शनाकरिता इनोव्हा कारने निघाले होते. नागपूर- तुळजापूर या महामार्गावर कळंब जवळ या इनोव्हा कारने ट्रकला धडक दिली. सोमवारी सकाळची पावणेसहाची घटना असल्याचे सांगितले जाते. अपघात इतका भीषण होता की इनोव्हा गाडी ही अक्षरश: ट्रकच्या मागच्या भागात जाऊन अडकून पडली आणि सुरक्षेच्या दृष्टीने लावलेल्या एअर बॅग्स च्या सुद्धा चिंधड्या झाल्या. कळंबच्या पोलीस निरीक्षक दीपमाला भेंडे यांनी तत्काळ घटनास्थळी धाव घेतली. या घटनेत 2 पुरुष आणि 2 महिलांचा जागीच मृत्यू झाला. मदतीसाठी गावकरी पुढे सरसावले . इनोव्हा कार मधील एकाची प्रकृती चिंताजनक असून त्याच्यावर यवतमाळ शासकीय रुग्णालयात भरती केले आहे .

घटनेची माहिती मिळताच आमचे सहकारी घटनास्थळी पोहचले आणि तत्काळ मदतकार्य सुरु केले . हे भाविक पंजाबमधून आले आहेत . ट्रक आणि इनोव्हा कार या एकाच दिशेने यवतमाळकडे चालल्या होत्या . इनोव्हा कारने ट्रकला मागून धडक दिली. रात्रभर प्रवास केल्याने ड्रायव्हरला झोप लागली असून त्यातून हा अपघात झाल्याची शक्यता वर्तविण्यात येत आहे. आम्ही पुढील तपास करीत आहोत . मी स्वतः घटनास्थळी भेट द्यायला निघालो आहे

– डॉक्टर पवन बनसोड ( पोलीस अधीक्षक , यवतमाळ )