चहा बनविण्यास नकार देणे बेतले जीवावर, सासूने केली सूनेची हत्या

हैद्राबादच्या अट्टापूरमध्ये गुरुवारी एक विचीत्र घटना घडली आहे. सासूला चहा देण्यास नकार देणे एका सूनेच्या जीवावर बेतले आहे. सासूने चक्क सूनेची गळा आवळून हत्या केली आहे. हत्येनंतर सासू फरार झाली असून पोलीस तिचा शोध घेत आहेत.

अजमीरा बेगम (28) असे मृत महिलेचे नाव आहे. गुरुवारी रात्री जवळपास सव्वा दहा वाजता अजमीरा हिला तिच्या सासू फरजाना बेगमने चहा बनवायला सांगितला. दरम्यान अजमीराने फरजाना यांना ती दुसऱ्या कामात व्यस्त असल्याने चहा देण्यासाठी नकार दिला. मात्र काही वेळ वाट पाहिल्यानंतर चहा न मिळाल्याने तिने अजमीरावर संताप व्यक्त केला. त्यावरुन दोघींमध्ये वाद झाला आणि तो विकोपास पोहोचला. संतापलेल्या फरजानाने अजमीराला धक्का दिल्याने ती खाली पडली आणि ओढणीच्या सहाय्याने तिचा गळा आवळला. त्यामुळे तिचा जागीच मृत्यू झाला.

या हत्येनंतर फरजाना फरार झाली आहे. याआधी स्थानिक लोकांच्या माहितीनंतर पोलीस घटनास्थळी पोहोचले. मात्र तोपर्यंत फरजाना घरातून फरार झाली होती. घटनेवेळी अजमीराचा पती अब्बास आणि त्याची दोन मुले आणि सासरे नव्हते. पोलिसांनी सांगितले दोघांचे 2015 मध्ये लग्न झाले होते. अट्टापूर पोलिसांनी केलेल्या तपासात कळले की, सासू-सूनमध्ये अनेक दिवसांपासून वाद सुरु होता. तो चहावरुन वाढला आणि सूनेची सासूने हत्या केली. याप्रकरणी पोलिसांनी गुन्हा दाखल केला असून फऱजानाचा तपास सुरु आहे. यासाठी पोलीस आरोपीच्या ओळखींच्या लोकांकडे तपास करत आहेत.