सांगलीत 45 लाखांचा पानमसाला, सुगंधित तंबाखूचा साठा जप्त

अन्न व औषध प्रशासन विभागाच्या विशेष भरारी पथकाने आज सांगली शहरामध्ये कारवाई करून 45 लाख 25 हजार 960 रुपये किमतीचा प्रतिबंधित अन्न पदार्थ पानमसाला व सुगंधित तंबाखूचा साठा जप्त केला, अशी माहिती सहायक आयुक्त (अन्न) नि. सु. मसारे यांनी दिली.

विशेष भरारी पथकास मिळालेल्या माहितीच्या अनुषंगाने अन्न सुरक्षा अधिकारी स्वामी व पवार यांनी जुने बुधगाव रोड येथील अल्ताफ रमजान मुलाणी यांच्या शेडची तपासणी केली असता, येथे राज्य शासनाने प्रतिबंधित केलेला पानमसाला व सुगंधित तंबाखूचा साठा आढळून आला. तसेच शेडसमोर उभ्या असलेल्या दोन वाहनांमध्येही पानमसाला व सुगंधित तंबाखूचा साठा आढळला. अन्न व औषध प्रशासन, सांगलीच्या पथकाने या ठिकाणी कारवाई करून 45 लाख 25 हजार 960 रुपये किमतीचा प्रतिबंधित अन्न पदार्थाचा साठा व 2 वाहने (किंमत 5 लाख 50 हजार रुपये) जप्त करून ताब्यात घेऊन शेड सीलबंद केले. या प्रकरणी पुढील तपासाकरिता शहर पोलीस स्टेशन, सांगली येथे प्रथम खबर अहवाल दाखल करण्यात आला आहे.

अन्न व औषध प्रशासन विभागाच्या विशेष भरारी पथकाचे अरविंद कांडेलकर, समुद्रे व सहायक आयुक्त (अन्न) मसारे यांच्या मार्गदर्शनाखाली अन्न सुरक्षा अधिकारी स्वामी व पवार यांनी ही कारवाई केली. जिह्यातील सर्व व्यावसायिकांनी प्रतिबंधित अन्न पदार्थाचा साठा, विक्री करू नये. तसा साठा आढळल्यास कायदेशीर कारवाई करण्यात येईल, असा इशारा देण्यात आला आहे.

Tags:

About The Author

Manisha Thorat- Pisal

सौ. मनिषा-थोरात-पिसाळ गेल्या १२ वर्षांपासून पत्रकारिता क्षेत्रात कार्यरत आहेत. ‘‘न्यूज एक्सप्रसे मराठी’’ या पुणे जिल्ह्यातील आघाडीच्या न्यूज पोर्टलच्या कार्यकारी संपादक म्हणून जबाबदारी सांभाळत आहेत. सामाजिक, राजकीय, शैक्षणिक आणि औद्योगिक क्षेत्रातील विविध समाजपयोगी उपक्रमांमध्ये त्यांनी योगदान दिले आहे.