लोकसभा निवडणुकीत दणका बसताच मिंधे सरकार ताळय़ावर

सिबिलची जाचक अट लावून बँकांकडून शेतकऱयांची पीककर्ज देताना अडवणूक केली जाते. लोकसभा निवडणुकीत त्याचा चांगलाच फटका मिंधे सरकारला बसला. त्यामुळे ताळय़ावर आलेल्या उपमुख्यमंत्री देवेंद्र फडणवीस यांनी सिबिलची सक्ती करणाऱया बँकांवर एफआयआर नोंदवण्यात येईल, असा इशारा आज दिला.

राज्यस्तरीय बँकर्स समितीची 163 वी बैठक आज सह्याद्री अतिथीगृहात पार पडली. मुख्यमंत्री एकनाथ शिंदे, उपमुख्यमंत्री देवेंद्र फडणवीस, अजित पवार, महसूलमंत्री राधाकृष्ण विखे- पाटील, कृषिमंत्री धनंजय मुंडे, सहकारमंत्री दिलीप वळसे-पाटील आणि वरिष्ठ अधिकारी त्या बैठकीला उपस्थित होते.

या बैठकीनंतर देवेंद्र फडणवीस यांनी प्रसारमाध्यमांशी संवाद साधला. अल्प, अत्यल्पभूधारक शेतकऱयांना पीक कर्ज देताना बँका सिबिलची सक्ती करत असल्याने शेतकऱयांना कर्ज मिळण्यात अडचण येते. परिणामी शेतकऱयांमध्ये प्रचंड निराशा असल्याचा मुद्दा यावेळी माध्यमांनी उपस्थित केला. त्यावर फडणवीस म्हणाले, राज्यस्तरीय बँकर्स समितीच्या बैठकीत ‘सिबिल’ची अट लावली जाणार नाही, असे दरवेळी सांगितले जाते. प्रत्यक्षात त्याची अंमलबजावणी होत नाही. यापुढे ‘सिबिल’मुळे कर्ज नाकारण्याचे प्रकार खपवून घेतले जाणार नाहीत. बँकांनी दिलेला शब्द पाळला पाहिजे. बँका ‘सिबिल’ची अट टाकत असतील तर आम्ही त्यांच्यावर ‘एफआयआर’ दाखल करू. हे तुम्ही तुमच्या सर्व शाखांना कळवा, अशा सूचना देण्यात आल्या असल्याचे फडणवीस म्हणाले.