‘नीट’ प्रकरणात शिक्षक संजय जाधव यांनाही अटक; 2 जुलैपर्यंत पोलीस कोठडी

देशात गाजत असलेल्या नीट परीक्षा पेपर फुटी प्रकरणात येथे दाखल करण्यात आलेल्या गुन्ह्यातील शिक्षक संजय तुकाराम जाधव यांना पोलिसांनी अटक केली होती. त्यांना 2 जुलैपर्यंत न्यायालयाने पोलीस कोठडी सुनावली आहे. देशात गाजणारे नीट परीक्षा पेपर फुटीचे प्रकरण लातूरपर्यंत पोहचले. लातूर येथे शिवाजीनगर पोलीस ठाण्यात परीक्षा पेपर फुटी प्रकरणी चौघाजणांविरुध्द गुन्हा दाखल करण्यात आला आहे. पोलिसांनी अगोदर जलील उमरखाँ पठाण (कातपूर जिल्हा परिषद प्रशाला शिक्षक) यास अटक केली होती. न्यायालयाने त्यांना 2 जुलैपर्यंत पोलीस कोठडी ठोठावली होती.

या प्रकरणातील चाकूर तालुक्यातील बोथी तांडा येथील रहिवासी व सोलापूर जिल्हा परिषदमध्ये शिक्षक असलेल्या संजय तुकाराम जाधव यांनाही अटक करण्यात आली होती. मंगळवारी पोलिसांनी न्यायालयासमोर उभे केले असता न्यायालयाने जाधव यास देखील 2 जुलैपर्यंत पोलीस कोठडी ठोठावली आहे. नीट परीक्षा पेपर फुटी प्रकरणात लातूर पोलिसांनी जलील उमरखाँ पठाण, संजय तुकाराम जाधव, ईरण्णा मष्णाजी कोंगलवार (आयटीआय शिक्षक उमरगा) व गंगाधर रा. दिल्ली अशा चौघांविरुध्द गुन्हा दाखल केला आहे. जलील पठाण आणि संजय जाधव यांना अटक केली. या प्रकरणात उर्वरित दोन जणांचा शोध सुरू आहे.