नगरच्या रेल्वे स्थानकातून बाळाचे अपहरण; सुप्यात धागेदोरे सापडले

नगरच्या रेल्वे स्थानकातून एका 11 महिन्यांच्या बाळाचे अपहरण झाले. या अपहरण प्रकरणी पोलिसानी तिघांना अटक केली असून बाळाची त्यांच्या तावडीतून सुखरूप सुटका केली आहे. विशेष म्हणजे एक महिला व 2 पुरुष अशा तिघांनी अपहरण केल्याची धक्कादायक माहिती समोर आली आहे. 16 जून रोजी दुपारी 3.30 वाजण्याच्या सुमारास नगर रेल्वे स्थानक मेनगेट परिसरातील एटीएम कॅबीनच्या समोरील लिंबाच्या झाडाखालून तक्रारदार अमृता आकाश खडसे (वय 23, रा. मु. पो. तोंडगाव ता. जि. वाशिम) यांच्याजवळ एक अनोळखी महिला (वय 35 ते 40 वर्षे) आली तिने तक्रारदाराशी ओळख वाढवून त्यांच्याजवळील 11 महिन्याचे त्यांचे बाळ स्वानंद आकाश खडसे याला स्थानकाबाहेरून जेवणाकरीता वरण भात घेवून येते अशी बतावणी करून बाळास पळवून नेले होते.

अनोळखी महीला बाळासह परत आलीच नाही. त्यामुळे बाळाच्या आईने नगर लोहमार्ग पोलीस ठाण्यात तक्रार दाखल केली. त्या अनोळखी महिलेविरोधात गुन्हा दाखल करण्यात आला होता. या गुन्हयाचा तपास पोलीस उपनिरीक्षक संजय लोणकर करीत असताना त्यांना गोपनीय माहिती मिळाली की, हा गुन्हा केलेले आरोपी सुपा परिसरात आहेत.

मिळालेल्या माहितीनुसार पोलिसांनी शिताफीने संशयितांना ताब्यात घेत विचारपुस केली. त्यांनी गुन्हा केल्याचे कबुल केले. या प्रकरणी अनिल अशोक जाधव (वय 41, रा. अमित मोटर्स पाठीमागे, सुपा, ता. पारनेर), नवनाथ विष्णु धोत्रे (वय 33, रा. गुंजाळवाडी, ता. संगमनेर), शालन अनिल जाधव (वय 38, रा. अमित मोटर्स पाठीमागे, सुपा, ता. पारनेर) यांना अटक करण्यात आली असून अपहरण केलेले बालक स्वानंद आकाश खडसे याची आरोपींच्या तावडीतून सुटका करण्यात आली आहे.