अलिबागमध्ये किती बांधकामे अनधिकृत आहेत याची माहिती शपथपत्रावर सादर करावी. या बांधकामावर कारवाई करावी, अशी मागणी करणारी याचिका उच्च न्यायालयात दाखल झाली आहे.
60 वर्षीय मेधा वैद्य व अन्य यांनी अॅड. उदय वारुंजीकर यांच्यामार्फत ही याचिका दाखल केली आहे. नागाव येथे किती बांधकामे अवैध आहेत याची माहिती वैद्य यांनी माहिती अधिकारात मागवली होती. येथे 250हून अधिक बांधकामे बेकायदा असल्याची माहिती तलाठी कार्यालयाने वैद्य यांना दिली. त्याचा तपशील याचिकेला जोडण्यात आला आहे. या याचिकेवर येत्या काही दिवसांत सुनावणी होण्याची शक्यता आहे.
काय आहे प्रकरण…
वैद्य यांचा नागाव येथे भूखंड आहे. त्यांचा तेथील जयवंत नाईक यांच्यासोबत वाद सुरू आहे. नाईक यांनी तहसीलदार कार्यालयात अर्ज दाखल केला. वैद्य यांचे बांधकाम पाडण्याचे व तेथील रस्ता वापरण्यास परवानगी द्यावी, अशी विनंती अर्जात करण्यात आली होती. त्याची दखल घेत बांधकाम पाडण्याचे अंतरिम आदेश तहसीलदार कार्यालयाने दिले. हा वाद प्रलंबित असताना काही बांधकामांवर कारवाई झाली, असा दावा वैद्य यांनी याचिकेत केला आहे.
नाईक यांचे बांधकाम बेकायदा
नाईक यांचेच बांधकाम बेकायदा आहे. त्यावर कारवाई करावी, अशी विनंती तहसीलदार कार्यालयाकडे करण्यात आली. त्यावर अद्याप कारवाई झालेली नाही. उलट नाईक यांना अवैध बांधकामाचे शुल्क भरण्यास सांगण्यात आले. नाईक यांच्या अवैध बांधकामावर कारवाई करावी, अशी मागणी वैद्य यांनी याचिकेत केली आहे.
.jpeg)
Comment List