…तर तुमच्या दारात आंदोलन करेन; आमदार तनपुरे यांचा कृषी अधिकाऱ्यांना इशारा

विमा कंपनी व कृषी खात्यातील अधिकारी संगनमताने पीक विम्याच्या संदर्भात शेतकऱ्यांची फसवणूक करत असल्याचे समजत आहे. शेतकऱ्यांना न्याय मिळाला नाही तर मी अधिवेशन सोडून तुमच्या दारात आंदोलन करेन, असा इशारा आमदार प्राजक्त तनपुरे यांनी कृषी अधिकाऱ्यांना दिला आहे. तनपुरे सोमवारी कृषी कार्यालयात आले होते. या वेळी त्यांच्यासोबत शिवशंकर राजळे, रफिक शेख, राहुल गवळी,अमोल वाघ, इलियास शेख, पिनु मुळे, सुनिल अकोलकर, संभाजी लोंढे, अंबादास डमाळे,पंढरीनाथ चोथे,सुनील पुंड, राजेंद्र पाठक, सुनिल लवांडे, हेमंत पडूळे, अमोल घोरपडे उपस्थित होते.

या वेळी विनीत रामभाऊ डमाळे या शेतकऱ्याने मी व माझ्या भावाने पीकविमा भरला. माझ्या भावाला पीकविमा मिळाला तर मला मिळणार नाही, असे सांगण्यात आले. हे एकूण संतप्त झालेल्या तनपुरे यांनी एकाला तुम्ही पीकविमा देतात अन दुसऱ्याला देत नाही याचे कारण काय? असा सवाल केला. या प्रकरणात जे दोषी असतील त्यांच्यावर निलंबनाची कारवाई केल्याशिवाय मी येथून उठणार नाही. ज्या शेतकऱ्यांनी पाचशे रुपये कंपनीच्या एजंटला दिले त्यांना विम्याचा लाभ देण्यात आला. मात्र ज्यांनी दिले नाही त्यांना वंचित ठेवण्यात आले. डमाळे यांच्या शेतीचा पंचनामा कोणी केला ते मला दाखवा. तुम्हाला पैसेच हवे असेल तर पाचशेच्या किती नोटा घेऊन येऊ ते सांगा. तुम्ही येथे हळदी कुंकू वाटण्यासाठी बसले नसून शेतकऱ्यांची कामे करण्यासाठी बसले आहेत. तुम्ही फक्त भाजपच्या लोकांची कामे करतात का? असा संतप्त सवालही त्यांनी केला.

या प्रश्नावर आपण अधिवेशनामध्ये लक्षवेधी उपस्थित करणार असून तातडीने दोषी अधिकाऱ्यांना निलंबित करा, अशी मागणी त्यांनी कार्यालयात उपस्थित असलेल्या सहायक कृषी अधिकारी सुनील देखणे यांच्याकडे केली. त्यानंतर तनपुरे यांनी जिल्हाकृषी अधिकाऱ्यांशी संपर्क केला. जिल्हा कृषीअधिकाऱ्यांनी येत्या दोन दिवसात या विषयाची माहिती घेऊन योग्य तो निर्णय घेऊ, असे आश्वासन दिल्यानंतर तनपुरे शांत झाले.