प्रेमात अडथळा, प्रॉपर्टीसाठी आईनेच केला मुलांचा खून,  पोलिसांच्या तपासात सत्य समोर

शेतजमीन आणि संपत्ती मुलांना मिळू द्यायची नाही व प्रेमात अडथळा नको, या हेतूने आईनेच प्रियकराच्या मदतीने पोटच्या दोन मुलांचा खून केल्याच्या घटनेने खळबळ उडाली आहे. याप्रकरणी संगमनेर तालुका पोलिसांनी महिलेसह तिच्या प्रियकराला अटक केली आहे. संगमनेर तालुक्यातील हिवरगाव पावसा गावात ही घटना घडली होती.

आई कविता सारंग पावसे (रा. हिवरगाव पावसा, ता. संगमनेर) आणि प्रियकर सचिन बाबाजी गाडे (रा. सावरगाव तळ, ता. संगमनेर) अशी अटक करण्यात आलेल्या आरोपींची नावे आहेत. दरम्यान, दोन्ही आरोपींना न्यायालयाने चार दिवसांची पोलीस कोठडी सुनावली आहे.

काही महिन्यांपूर्वी संगमनेरमधील हिवरगाव पावसा येथील रितेश सारंग पावसे (वय 12) आणि प्रणव सारंग पावसे (वय 8) या भावंडांचा शेततळ्यात बुडून मृत्यू झाला होता. मात्र, पोलिसांनी अपघाती मृत्यूची नोंद केली होती.

मात्र, मुलांच्या मृत्यूबाबत गावकऱयांना संशय होता. कारण मृत मुलांच्या आईचे सावरगाव तळ येथील सचिन गाडे याच्याशी प्रेमसंबंध होते. मात्र, पोलीस तपासात दिरंगाई होत असल्याने या प्रकरणाची कसून चौकशी करण्यासाठी आंदोलन करण्यात आले होते. त्यानंतर पोलीस उपअधीक्षक सोमनाथ वाघचौरे यांनी यात गांभीर्याने लक्ष घालून तपास करण्याच्या सूचना दिल्या होत्या. तपासात प्रेम प्रकरणात अडथळा आणि प्रॉपर्टीसाठी मुलांचा खून करण्यात आला असल्याचे प्रथमदर्शनी आढळून आले आहे. त्यामुळे सदर महिला आणि तिच्या प्रियकरावर खुनाचा गुन्हा दाखल करून त्या दोघांनाही अटक करण्यात आली आहे.

संशयित आरोपी महिला हिच्या पतीचेदेखील निधन झालेले आहे. त्या बाबतही आता कुजबूज सुरू आहे. महिलेच्या मयत पतीची मोठी शेतजमीन व संपत्ती मुलांच्या नावावर होईल. या दुहेरी हेतूने हा खून करण्यात आला.