‘एनडीए’तील लोक आमच्या संपर्कात; एक छोटीशी गडबड झाली तरी मोदी सरकार कोसळणार

लोकसभा निवडणुकीच्या निकालानंतर हिंदुस्थानातील राजकीय परिस्थितीमध्ये मोठा बदल झाला आहे. एनडीएमधील मित्र पक्षांच्या टेकूवर पंतप्रधान नरेंद्र मोदी यांचे सरकार उभे आहे. सरकारला अस्तित्वासाठी संघर्ष करावा लागेल. त्यामुळे एक छोटीशी जरी गडबड झाली तरी मोदी सरकार कोसळेल, असा दावा काँग्रेस नेते राहुल गांधी यांनी केला. मोदी सरकारमध्ये मोठय़ा प्रमाणात असंतोष आहे. त्यामुळे एनडीएतील काही लोक आमच्या संपर्कातत आहेत, असा गौप्यस्फोटही राहुल गांधी यांनी केला आहे.

लोकसभा निवडणूक निकालानंतर राहुल गांधींनी एका इंग्रजी दैनिकाला दिलेल्या मुलाखतीत पंतप्रधान मोदींवर हल्ला चढवला. निवडणूक निकालामुळे मोदींची विचारधारा संपली आहे. भाजपचा मूळ पाया आणि धार्मिक द्वेष पसरवण्याची त्यांची विचारधाराही डळमळीत झाली आहे, असे त्यांनी सांगितले.

मोदींच्या गटात प्रचंड असंतोष

भाजपच्या खासदारांची संख्या कमी आहे. मित्र पक्षांच्या टेकूवर मोदींचे सरकार आहे. एका जरी मित्र पक्षाने भूमिका बदलली तर हे सरकार पडेल. एक छोटीशी गडबड झाली तरी सरकार कोसळू शकते. मोदींच्या गटातही मोठा असंतोष आहे. त्यामुळे एनडीएतील काही लोक आमच्या संपका&त आहेत, असा दावा राहुल गांधींनी केला.

‘इंडिया’ आघाडीला जनतेने साथ दिली

द्वेष पसरवणे, भावना भडकावून आपला राजकीय हेतू साध्य करायचा, अशी भाजपची विचारधारा आहे. मात्र देशातील जनतेने भाजपची ही विचारधारा फेटाळली, असे राहुल गांधींनी ठणकावले. इंडिया आघाडीने एकजुटीने निवडणूक लढली आणि जनतेने आम्हाला साथ दिली, असे त्यांनी सांगितले.