विधानपरिषदेच्या 11 जागांसाठी 12 जुलैला मतदान; निवडणूक आयोगाकडून घोषणा

विधानपरिषदेच्या 11 जागांसाठीची निवडणूक जाहीर करण्यात आली आहे. निवडणूक आयोगाकडून महाराष्ट्राच्या विधानपरिषदेच्या 11 जागांसाठी निवडणुकीची घोषणा आज करण्यात आली. या घोषणेसोबतच त्यांनी वेळापत्रकही जारी केलं आहे. सर्व राजकीय पक्षांनी या निवडणुकीसाठी उमेदवारांची निवड प्रक्रियाही सुरू केली आहे.

निवडणूक आयोगाने जाहीर केलेल्या निवडणूक कार्यक्रमानुसार विधानपरिषदेच्या 11 जागांसाठी येत्या 12 जुलै रोजी मतदान होणार असून 12 जुलै रोजीच त्याचा निकाल जाहीर करण्यात येईल. या निवडणुकीसाठी येत्या 25 जून रोजी निवडणूक आयोगाकडून अधिसचून जारी करण्यात येईल. उमेदवारांना आपला उमेदवारी अर्ज 2 जुलैपर्यंत दाखल करता येईल. तर 3 जुलै रोजी अर्जांची छाननी केली करण्यात येईल. उमेदवाराला आपला उमेदवारी अर्ज मागे घेण्यासाठी 5 जुलैपर्यंतची वेळ देण्यात आली आहे. यानंतर 12 जुलै रोजी या निवडणुकीसाठी मतदान घेण्यात येईल. सकाळी नऊ ते दुपारी चार पर्यंत मतदानाची वेळ असेल. त्यानंतर लगेचच मतमोजणीची प्रक्रिया सुरू करून निकाल जाहीर केला जाईल.

विधानसभा आमदारांच्या मतदानातून विधान परिषदेवर पाठवण्यात आलेल्या 11 आमदारांचा कार्यकाळ येत्या 27 जुलै रोजी संपत आहे. या आमदारांच्या जागेवर अन्य व्यक्तींची आमदार म्हणून निवड केली जाईल. 27 जुलै रोजी कार्यकाळ संपणाऱ्या आमदारांमध्ये निलय नाईक, विजय गिरकर, रमेश पाटील, रामराव पाटील (भाजप), महादेव जानकर (भाजप मित्र पक्ष), अनिल परब (शिवसेना – उद्धव बाळासाहेब ठाकरे), मनीषा कायंदे (शिंदे गट), डॉ. वजाहत मिर्झा व डॉ. प्रज्ञा सातव (काँग्रेस), बाबाजानी दुराणी (राष्ट्रवादी), जयंत पाटील (शेकाप) या 11 आमदारांच्या नावांचा समावेश आहे.