मशीद बंदर येथील इमारतीला आग, लाकडी इमारतीचे नुकसान; सुदैवाने जीवितहानी नाही

मशीद बंदर येथील चकाला मार्गावरील चार मजली रहिवासी इमारतीला आज दुपारी आग लागली. इमारत लाकडी असल्यामुळे मोठय़ा प्रमाणात धूर झाल्याने एकच घबराट पसरली. अग्निशमन दलाच्या जवानांनी साडेतीन तासांच्या अथक प्रयत्नांनी आगीवर नियंत्रण मिळवले. सुदैवाने यात कोणीही जखमी झाले नाही. दरम्यान, शॉर्टसर्किटमुळे ही आग लागल्याचे म्हटले जात आहे.

मशीद बंदर येथील चकाला स्ट्रीट, झकेरिया रोडवर चार मजली इमारत आहे. इमारतीच्या चौथ्या मजल्यावरील एका घराला दुपारी एकच्या सुमाराला आग लागली. इमारतीचे बांधकाम लाकडी असल्यामुळे ही आग बाजूच्या दोन घरांमध्येही पसरली आणि सर्वत्र धुराचे लोट पसरले. इमारतीमधील सर्व रहिवासी इमारती बाहेर पडले. मात्र, चौथ्या मजल्यावरच एक वृद्ध जोडपे अडकून पडले होते. प्रसंगावधान राखून तिथे पोहोचलेल्या पोलिसांनी अडकून पडलेल्या वृद्ध जोडप्याला सुखरूप इमारतीबाहेर आणले. दरम्यान, आगीत इमारतीचा जिना जळून खाक झाला. त्यामुळे घटनास्थळी पोहोचलेल्या अग्निशमन दलाच्या जवानांनी खालून आणि बाजूच्या दोन इमारतींमधून पाण्याचा मारा करून साडेतीन तासांनी आग नियंत्रणात आणली. सुदैवाने आगीत कोणीही जखमी झाले नाही. मात्र, चौथ्या मजल्यावरील तीन घरांचे मोठय़ा प्रमाणात नुकसान झाले.