रियासीतील हिंदू भाविकांचे रक्त सुकले नाही, तोच डोडा, कठुआत अतिरेकी हल्ले! दोन अतिरेक्यांचा खात्मा, एक जवान शहीद

दिल्लीत एनडीएचे सरकार शपथ घेत असतानाच कश्मिरात अतिरेक्यांनी वैष्णोदेवीला जाणार्‍या हिंदू भाविकांच्या रक्ताचा सडा पाडला होता. ही घटना ताजी असतानाच गेल्या २४ तासांत पुन्हा अतिरेक्यांनी डोडा आणि कठुआ येथे जोरदार हल्ला चढवला. कठुआत लष्कराने दोन अतिरेक्यांचा खात्मा केला. डोडा जिल्ह्यात लष्कराच्या चेकपोस्टवर अतिरेक्यांनी केलेल्या अंदाधुंद गोळीबारात पाच जवान गंभीर जखमी झाले आहेत. दरम्यान, या चकमकीत एक जवान शहीद झाल्याचे वृत्त आहे.

जम्मू-कश्मिरातून कलम ३७० हद्दपार केल्यानंतर तेथील दहशतवाद संपला असल्याचा दावा मोदी सरकारने केला होता. पंतप्रधान नरेंद्र मोदी, केंद्रीय गृहमंत्री अमित शहा यांनीही कश्मिरात शांतता नांदत असल्याची फुशारकी मारली होती. परंतु रियासी, डोडा आणि कठुआतील अतिरेकी हल्ल्यांनी हा दावा फोल ठरवला आहे.

रियासीतील भाविकांच्या बसवरील गोळीबाराची घटना अजून ताजी असतानाच काल रात्री डोडा जिल्ह्यातील छत्रगला येथे असलेल्या लष्कराच्या चेकपोस्टवर अतिरेक्यांनी गोळीबार केला. अतिरेक्यांच्या गोळीला जवानांनी गोळीनेच उत्तर दिले. या चकमकीत पाच जवान आणि लष्कराचा एक अधिकारी गंभीर जखमी झाला. अंधाराचा फायदा घेऊन अतिरेकी जंगलात पळाले. अतिरेक्यांच्या शोधासाठी तातडीने कोम्बिंग ऑपरेशन राबवण्यात येत आहे. पूंछ, रियासी तसेच राजौरीच्या जंगलामध्ये अतिरेक्यांच्या शोधासाठी पथके रवाना करण्यात आली आहेत.

अतिरेक्यांनी दुसरा हल्ला कठुआ जिल्ह्यातील हिरानगर येथे केला. अतिरेकी लपल्याच्या सूचनेवरून या भागात शोधमोहीम राबवण्यात येत होती. लष्कराने आपल्याला चोहोबाजूने घेरल्याचे लक्षात येताच अतिरेक्यांनी गोळीबार सुरू केला. लष्करानेही त्याला तडाखेबंद प्रत्युत्तर दिले. गोळीबारात ठार झालेल्या एका अतिरेक्याचा मृतदेह रात्रीच आढळला. दुसर्‍या अतिरेक्याचा खात्मा आज सकाळी करण्यात आला. काही अतिरेकी जंगलात पळून गेले. घटनास्थळावरून मोठ्या प्रमाणावर शस्त्रास्त्रे, दारूगोळा जप्त करण्यात आला आहे.

अतिरेक्यांशी उडालेल्या धुमश्चक्रीत जी. डी. कबीरदास हा जवान शहीद झाला. कबीरदास छिंदवाडा येथील रहिवासी असून त्यांचे पार्थिव गुरुवारी येणार असून लष्करी इतमामात त्यांच्यावर अंत्यसंस्कार करण्यात येणार आहेत.